DAVAO DE ORO -- Gidayeg sa mga netizens ang upat ka mga batan-on nga way pagduha-duhang mihatud sa napunitan nilang pikata ngadto sa kapulisan sa Nabunturan Municipal Police Station sayo sa buntag niadtong Lunes, Pebrero 22, 2021.
Mga batan-on giila nga sila si Tejay Paulma, 12; John Lucero, 11; Liezel Boiser, 16; ug Justin Pag-ong, 13, nga pulos molupyo sa Purok 4, Barangay Poblacion, Nabunturan.
Matud pa nga napunitan sa mga batan-on ang pitaka nga gipanag-iyahan sa usa ka Lucita De Veyra, 58, taga Barangay Poblacion sa nahisgutang lungsod ug duna kini sulod nga salapi, IDs ug uban pang importanteng dokumento.
Labihan ang pasalamat ni De Veyra human nauli kaniya ang iyang pitaka.
Sa post sa social media, mibaha ang pagdayeg sa mga netizens sa upat ka mga batan-on.
Sumala pa sa usa ka Letlet Galas-Canete sa iyang post sa Facebook page sa LGU-Nabunturan nga "Good Job, sana all ing ana mga tao dinhi sa Poblacion, Nabunturan."
Gidayeg sab ni Reign Arnaiz ang mga ginikanan sa upat ka mga batan-on sa iyang post "Congratulation sa mga parents ng mga batang ito. Maganda ang pagpapalaki nyo sa mga bata."
Ug si Aj Mo mipadayag sab sa iyang kalipay subay sa iyang post nga "basta Nabunturan honest siyempre."
Gihimo ang pag-uli sa pitaka sa mga batan-on mismo ngadto sa tag-iya sa Nabunturan police. (Dexter T. Visitacion)