SUPERBALITA CEBU

Diputado: Batikos galore sa Bohol

Cuentas Claras

Giulan og batikos ang giplano unta sa probinsiya sa Bohol nga magtukod og bagsakan center duol gyod mismo sa CPG Park.

Daghan ang wala mouyon niini kay matod pa, kulang sa pagtuon ang maong giplano nga tukuron.

Migahin ang probinsiya sa kantidad nga 8 milyones ka pesos alang sa maong proyekto. Gisugdan na ang foundation niini og diha nay mga puthaw nga gisugdan og welding.

Takulahaw lang, naundang kini. Ang rason – wala diay mokuha og building permit ang probinsiya alang sa maong proyekto og gipaundang kini sa OBO sa siyudad.

* * *

Daghan ang kalapasan sa maong proyekto.

Una, wala kini building permit; angay kuhaon kini sa dili pa sugdan ang pagtrabaho sa maong building. Ikaduha, nakasupak kini sa zoning ordinance sa siyudad. Sa maong zoning ordinance, gidili ang pagtukod og usa ka wet market sa lugar nga duol sa eskuylahan, karsada o parke.

* * *

Daghan ang natingala.

Kon padayonon ang pagtukod sa maong bagsakan center, segurado nga makamugna kini og makalilisang nga bul-og sa trapiko.

Trapik na man gani ang maong lugar nga ang eskuylahan ug mga korte lang ang naa diha sa una, unsa na kaha kon pun-an pa kini sa kapitolyo ug sa DepEd? Dugang pa nga ang maong lugar agianan sa mga sakyanan nga gusto motipas sa city proper og moderetso sa city hall. Mosamot gyod ka-trapik kon magpundo na ang mga sakyanan sa mamalitay.

Ang nakaparat ra ba kay kon tukoron kini og lahos, wala nay lugar para parkingan. Buot ipasabot, anha na lang pod mo-parking ang mamalitay sa kilid sa karsada?

Susmariosep.

Daghan na man unta nga mga merkado ang siyudad nga magamit para sa ilang gitawag og “showcase,” nganong magtukod pa man gyod og lain nga dili haom sa maong lugar?

Sa hunahuna sa kadaghanan, kinahanglanon ba gyod kaayo kining maong kagastohan nga aduna man untay mas importante pa nga magastohan sa 8 milyones ka pesos sama sa testing kits o kaha, vaccine para sa Covid?

* * *

Unsa ka-tinood ang balita nga nausab ang hunahuna sa usa ka mayora og dili na lang kini molahos pag-lansad pagka-kongresista?

Kon kahinumdoman, isog ug mapasigarbohon kaayo ang mayora nga mipadayag sa iyang plano sa politika atubangan sa mga sakop sa media bisan sunod tuig pa ang piniliay kay matod pa niya, lig-on man sab kuno siya nga pagka-politiko. Unsa kahay rason nga nausab man?

Tungod ba kini kay kasagaran sa iyang duolon nga mga mayor sa distrito, mobalibad sa iyang hangyo nga suporta?

Tungod ba kini sa sulsol sa iyang boyfriend nga dili na lang mopadayon sa iyang plano sanglit wala may klaro kon tinuod ba ang gimakmak kaniya nga 50 milyones gikan sa usa ka marama nga politiko?

O, tungod ba kini kay gibati na siya og kalisod sa iyang mga pangindahay sa politika unya wala na ang iyang magtatambag nga iyaan nga hilabihan sab ka kurakot?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!