Kinsa ning tulo ka mga consultant nga doktor nga nagpataka og rekomendar nga ang Sugbo ipaubos sa lockdown?

Kay ato ning tabangan og laba sa pagsaway. Pagka walay klaro ninyo, doctors, di man intawon taas ang kaso sa Covid-19 sa Cebu province.

Unsa man, doc, mopatabang mo og pakaon sa mga tawo nga magutman kon mag lockdown ang Sugbo?

Pagtarong kuno mo!

Gipikhan namo ni Cebu Gobernador Gwen Garcia kay pataka lang mo og buka sa inyong baba.

Klaro nga wala mo magtuon ug morag natulog man mo sa inyong trabaho ug pagka dagko ra ba ninyo og suweldo.

Maayo nalang gani kay wala tuhu-i sa Malakanyang ang rekomendasyon sa mga sipsip nga doctors.

CEBU CITY

Di ba kaha moingon ang sipsip nga mga doctor di man ang Cebu province ang among ipasabot nga i-lockdown. Ang Cebu City man ang among ipasabot kay taas kaayo ang kaso sa Covid-19 matag adlaw tag tulo ka digits.

Way lalis taas ang kaso sa Cebu City. Pero 80 porsiyento sa mga nahimong positibo mga aymptomatic man.

Sa sitwasyon sa kahimtang sa ekonomiya karon wa na kinahanglana ang pag-lockdown. Hinayhinay na pagbuhi ang ekonomiya.

Balansihon lang kaha nato ang kahimtang sa ekonomoya ug ang Health. Delikado mamatay sa kagutom ang mga tawo.

Naglihok sab si Cebu City Mayor Edgardo Labella sa kampanya batok sa Covid-19 apan supak anang gitawag og lockdown kay naluoy sa kahimtang sa mga trabahante.

SUGBONAR NI BATUHAN

Daghan ang dili magpabakuna sa Covid-19 gumikan sa ilang kahadlok nga dili maayo ang epekto niini.

Tungod niini, mopahigayon ug online seminar si Atty. Totol Batuhan dinapit si Dra. Junjie Zuasula sa Department of Health ( DOH 7).

Si Zuasula maoy regional epidemiologist sa DOH 7. Mamahimo sab kamo makapangutana ug makasalmot sa diskasyon pinaagi sa Q & A. I-click ang Zoom link https://zoom.us/j/95623513582.