Gikuwestyon sa Children’s Legal Bureau ang pamaagi sa pagkuha sa mga batang Lumad sa mga otoridad gikan sa usa ka retreat house sa University of San Carlos (USC)-Talamban Campus niadtong February 15, 2021.
Lakip sa 26 ka mga tawo nga gidakop sa kapolisan inubanan sa mga social workers ang 16 ka mga estudyante nga nagpangedaron og ubos 18 anyos ug tulo ka mga tinun-an nga nagpangedaron og 18 anyos ug pataas.
Gitawag sa kapolisan nga “rescue” ang hitabo, apan ang mga videos online nagpakita nga gisikop sila nga walay basehan.
Dunay dako nga kalapasan sa mga saktong pamaagi human nga mihatag og trauma ang maong kasinatian sa mga bata.
Wala man unta nabutang sa kalisdanan ang mga bata nga nabutang sa kustodiya sa ilang mga guardians, magtutudlo ug mga lider sa ilang tribo ug dunay pagtugot ug giya sa USC ug Societas Verbi Divini (SVD) community. Duna poy endorsement kini gikan sa Cebu Archdiocesan Commission on Social Advocacies (Cosa).
Ang mga tinun-ang Lumad nagpuyo sa retreat house dul-an usa ka tuig sukad Marso 2020. Anaa man unta sa luwas nga lugar ang mga bata.
Ang estriktong pagpatuman sa mga regulasyon sa kwarantina maoy nakapugong sa ilang pag-uli.
Ang angay unta nga gibuhat sa awtoridad maong ang pagcoordinate kang Cebu Archbishop Jose Palma nga maoy nagduma sa COSA ingon man sa pag-contact sa SVD. Malikayan unta ang ngil-ad nga kasinatian sa mga bata human sa gubot nga operasyon sa kapolisan ug social workers.
Walay sayop nga gibuhat ang mga bata. Dili usa ka krimen ang pagpuyo sa maong retreat house aron mo-eskwela. Wala gitan-aw sa awtoridad kon unsay makaayo sa mga bata o mupatuman og child-friendly nga pamaagi sa kustodiya sa mga bata.
Apan ang PNP ug ang Cebu City Department of Social Welfare and Services (DSWS) gipili nga himoong piyestahan sa publiko ang maong hitabo. Gani gitugutan ang live media coverage sa operasyon nga sukwahi sa pagpanalipod sa mga bata.
Tataw ang kahadlok sa mga estudyanteng Lumad human nga pugos sila nga gikuha sa luwas nga lugar. Ang ubang bata giposasan. Nakasaksi sab ang mga bata sa kagubot tali sa mga pulis ug mga edaran nga kauban sa mga bata. Inay nga rescue, usa ka ilegal ka pag-aresto ang gihimo sa mga bata.
Angay sab nga himug-atan nga unom lang sa 16 ka mga menor de edad ang dunay ginikanan o paryente nga mikuha sa mga bata diri sa Cebu.
Mao nga gikuha ang serbisyo sa CLB sa mga ginikanan sa pito ka mga bata gikan sa Talaingod, Davao Del Norte aron pugngan unta ang paglarga sa ilang mga bata niadtong Pebrero 21 apan gipalarga gihapon ni sa mga naggunit nila bisan pa man nga walay pagtugot.
Gitawag sab ang mga bata nga mga “warrior trainees” nga klaro nga gi-sensationalize ang kasinatian sa mga bata.
Nanganhi ang mga batang Lumad sa Sugbo aron mapadayon ang ilang pag-eskwela human nga dunay militarsisasyon sa ilang mga lugar.
Ang maong pasangil kay sukwahi sa mga prinsipyo nga gilatid sa Juvenile Justice and Welfare Act (JJWA) nga likayan unta ang pag-sensationalize ang isyu sa mga children in conflict with the law (CICLs).
Kinahanglan nga dunay imbestigasyon nga himuon ang nagkadaiyang ahensya sa gobyerno aron mapanubag ang mga responsableng opisyales sa paglapas sa mga child protection laws sa mga kalapasan nga nahimo sa maong operasyon sa kapulisan.
[Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]