SUPERBALITA CEBU

'Hugaw nga lawak gipapuy-an' sa gi-Covid

WA GAMITA? Si Joana Modesto ni-post aning hugaw nga comfort room (tuo) sa usa ka barangay isolation center (BIC) sa Barangay Pardo. Apan matod sa in-charge sa BIC nga ang gi post mao ang hulagway sa CR ug lawak nga wa gamita. Gipakita usab ni Quimhe Chan, in-charge sa BIC, ang limpyong pansayan (ibabaw) agig tubag sa reklamo ni Modesto. / TAMPO

Makahahadlok nga kasinatian kon ihulagway ni Joana Modesto, usa ka technical support sa pribadong kompanya, ang iyang pagka isolate sa usa ka pasilidad sa mga nagpositibong kaso sa coronavirus disease (Covid-19) sa barangay isolation center (BIC) extension sa Barangay Pardo, Dakbayan sa Sugbo.

Inay mamaayo ang usa ka pasyente, daw napurhisyo na hinuon siya tungod sa giingong kabaho, kahugaw sa kwarto ug way klaro nga monitoring sa mga pasyente.

“Depressing siya, hadlok kaay ko.Kanang makaingon pud ka nga traumatic ba. Kana bayang mga tawo nga madala sa isolation or ma-positive grabe na baya na sila kaguol sa unsa nay mahitabo sa ilaha unya pun-an pa nga ingon ana ang ilang madangtan ba,” matod ni Modesto sa Superbalita Cebu sa Pebrero 23.

Si Modesto ug ang iyang pag-umangkon nga 4-anyos nag-uban sa maong pasilidad human nga nataptan sa Covid-19 ang sakop sa pamilya niini. Ang duha pulos mga asymptomatic.

Saysay ni Modesto, unang gabii nga niabot sila sa pasilidad, gipasulod sila ug gipapili sa ilang gustong higdaan.

“Pag-abot man gud namo gyud, gipasulod mi, gitagaan og pang personal hygiene unya niingon ra ang duha ka tig bantay na BHW, na sige, sulod lang mo. Pili lang mo kon asa mo na room,” matod ni Modesto. Apan natingala ang pasyente nga hugaw ug baho ang palibot.

“Ang mga nasulod didto na mga patient automatic na sila na lang gyud ang nanglimpyo sa hugaw na ilang nadatnan,” dugang saysay ni Modesto.

Hinuon, maayo ang pagkaon nga gidalit sa mga pasyente.

Apan tungod sa nakitang risgo, nireklamo si Modesto sa mga barangay health worker ug uban pa nga mga tigduma sa pasilidad, apan matod niya, siya napakyas.

“Sa LGU ug sa EOC ug sa DOH, but mag pasa-pasa gyud sila. Nireklamo ko sa BHW unya ang giingon nila nako gud kay, ‘Maam,’ naa may hotel, paghotel nalang mo. Ingnan raka na dili daw na ilang responsibilidad, amo daw nang responsibility nga naa sa sulod,” dugang ni Modesto.

Sila si Modesto nipuyo sa pasilidad niadtong Pebrero 15-19.

Aron makalingkawas sa pasilidad, nagpatabang siya sa mga higala aron makabalhin sa hotel sa Dakbayan sa Sugbo. Tuod man, nakabalhin siya ug didto na nagpadayon sa isolation.

Panawagan ni Modesto sa kagamhanan: “Hopefully gani tarungon nila og dala ang mga tawo ba. Tarungon nila og pahimutang... Luoy man gud ang mga tawo gud sige mo pasalig nga naay ingon ani ingon ana unya ig abot sa taw didto, maski vitamins wala... Wala man nangita ang mga tawo og luxurious stay but kana lang unta gyud sanitary ug safety nga lugar.”

Apan matod ni Kimhe Chan, in-charge sa BIC, nga ang naa sa hulagway nga gi-post ni Modesto mao ang lawak ug comfort room nga wa gamita.

Nahibulong sila kon nganong didto sa mao nga lawak nipili nga unta naa pa may bakante sa ubang rooms nga gilimpyuhan na daan.

Iyang gihulagway nga pangdaut ang mga hulagway nga gipakita. (ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph