DALAW sa mga selda sa 11 ka police stations ug sa Camp Sotero Cabahug sa Cebu City Police Office (CCPO) kasamtangan nga gisuspenso human unom ka mga dinakpan sa Pardo Police Station nagpositibo sa coronavirus disease 2019 (Covid-19).
Samtang mga pulis nga naka close contact sa mao nga mga piniriso gipaubos na sa swab test ug isolation.
Gikompirmar sa CCPO nga adunay unom ka mga binilanggo sa Pardo Police Station nag positibo sa Covid human sila gipaubos sa swab test sa di pa dad-on sa Cebu City Jail nga gidumala sa Bureau of Jail Management and Penology (BJMP).
Matod ni Police Lieutenant Colonel Wilbert Parilla, deputy city director for operations, nga sa pagkakaron gisuspenso una nila ang dalaw sa tanang kabanay sa 11 ka police stations lakip na sa bilanggoan sa sulod sa Camp Sotero Cabahug sa dalan Gorodo.
Wa gi-lockdown ang police station, apan gipaubos na nila sa disinfection ang sulod sa selda samtang mga pulis nga naka close contact sa mga dinakpan gipa isolate lang una samtang magpaabot sa resulta sa swab test.
“Just like what we have done sa previous nga mga stations nga dunay nag positive, ato sang ihunong ang pagpasulod og mga arrested person and atong i-decontaminate ang tibuok station. Pero dili nato i-lockdown, kato lang directly na contact sa mga arrested maoy atong i-isolate,” matod Parilla.
Nagtuo si Parilla nga positibo nang daan sa gawas ang mga dinakpan sa dihang gidala sa police station ug nakapanakod sa ubang mga piniriso sa selda.
Wala lang una pasudli sa mga bag-ong dinakpan ang selda sa Pardo Police Station.
Gimandoan ni Parilla ang hepe sa maong estasyonan, Police Major Jose Angelo Acupinpin, nga didto kasamtangan nga itanggong sa CCPO.
Tungod sa padayong pagsaka sa mga kaso sa Covid-19 sa Siyudad sa Sugbo, adunay mga medical personnel ang gipa augment sa matag police station nga maoy mo monitor sa panglawas sa mga pulis.
Sa kasamtangan, adunay 10 ka mga pulis sa dakbayan ang natakboyan sa virus nga naa na sa isolation area nga giatiman na sa Regional Health Service 7 sa Police Regional Office (PRO) 7.