MITAHAN ngadto ni Lapu-Lapu City Mayor Junard “Ahong” Chan ang giingong drug pusher nga nalutsan ug warrant of arrest sa RTC Branch 71 pinirmahan ni Judge Rosario Evelyn Roldan Sistosa-Singco.
Ang misurender giila nga si Renato Macayana, 39, taga-Sitio Kalabasa, Barangay Gun-ob, Dakbayan sa Lapu-Lapu.
Nasayran nga si Macayana naka-ipsot sa buybust operation sa City Intelligence Branch (CIB), Lapu-Lapu City Police Office (LCPO) niadtong Oktubre sa miaging tuig.
Apan human nga nasayod nga aduna siyay warrant of arrest nakahukom si Macayana nga motahan sa iyang kaugalingon apan naneguro sab sa iyang seguridad.
Una nga mipadayag si Macayana pinaagi sa iyang igsuon nga ngadto motahan ni Super Bobby Nalzaro sa Dyss Super Radyo apan gumikan sa nasinating pandemya mas gipili niining adto na lang sa panimalay sa iyang inahan sa Barangay Gun-ob motahan.
Plano unta niyang magpadala sa buhatan ni Chan apan gipakuha siya sa mayor sa balay sa iyang inahan.
Matod ni Macayana nga gusto lang gayud siya nga moatubang sa maong kaso aron sa paglimpyo sa iyang kaugalingon ingon man ngadto sa iyang pamilya wala siyay sala.
“Mao man gyud ni proseso sir kay ako man pangalan naa gyud sa warrant,” pasabot ni Macayana.
Mipasalig si Chan nga walay angay kabalak-an si Macayana sanglit makasiguro kini sa iyang seguridad sa kamot sa kapulisan.
“Naa man tay balaod unya naa man ni siya warrant iya na lang gyud ni atubangon kay kani pamilyaha di man sad nato ig lain ato ning kaila kay ato ning kababata ang ilang kamaguwangan,” matod ni Chan. (GCM)