SUPERBALITA CEBU

No to lockdown

File photo

Mipasalig si Cebu City Mayor Edgardo Labella nga way ipatuman nga lockdown sa tibuok dakbayan.

Kini taliwala sa nagsaka nga kaso sa coronavirus disease (Covid-19) sa dakbayan ilabi na sa Pebrero.

“We will not allow (total lockdown) because we experienced unsa kapait kon mag lockdown. So there will be no more lockdown in the entire city because kon mahitabo na simbako lang, luoy kaayo atong katawhan, samot kalisod ang kinabuhi,” padayag ni Labella.

Ang DOH 7 pinaagi ni Dr. Mary Jean Loreche, chief pathologist, niapelar ngadto sa TAC ug hatagan sila og higayon nga maka-review sa data.

Dugang sa mayor nga bisan kon ang Cebu City anaa sa lowest level sa quarantine classification apan wa kini mokumpyansa gani, ang sinehan, concert, tigbakay nga gitugot sa MGCQ wala kini tugoti dinhi sa dakbayan

Kon aduna may lockdown, granular lang ang ipatuman sama sa pag-lockdown sa balay, karsada ang ipatuman apan dili ang 80 ka barangay.

MANDAUE CITY



Samtang si Mandaue City Mayor Jonas Cortes naglaum nga huna-hunaon una pag-ayo ug mohatag og konsiderasyon sa technical advisory council sa Department of Health (DOH) Central Office kon ipaubos ang Sugbo sa enhanced community quarantine (ECQ)

Gibalak-an ni Cortes ang grabeng epekto sa ekonomiya sa Mandaue kon isaka ang quarantine level.

Sa pakighinabi sab sa Superbalita Cebu ni Atty. John Eddu Ibañez, ang executive secretary ni Cortes, nga ang tinguhang pagpaubos sa tibuok Lalawigan sa Sugbo nga naglakip ang Dakbayan sa Mandaue sa ECQ dako og epekto sa ekonomiya.

“Naghinay-hinay na ta og open. Nahinay-hinay na ta og establish and we are living with Covid-19 na. Ato na giistrikto ang atong quarantine protocols nya i-lockdown tag balik?

The opinion of Mayor, we would never survive another lockdown, economically,” dugang ni Ibañez.

Sa panahon sa ECQ sa 2020 ang mga essential lang nga establisemento ang gitugotan nga makapangabli ug wala gitugot nga pampublikong transportasyon.

Sa posibleng pagbalik sa ECQ, sigon ni Ibañez nga daghang mga negosyo ang magsira na sab lakip na ang bag-o lang nag-abli ubos sa MGCQ.

Sa higayon nga kini mahitabo adunay daghang trabahante nga mawad-an og trabaho.

“Okay lang kung naa tay savings sa rainy days unsaon naman lang to katong kung dili makatrabaho dili makakaon?” matod pa Ibañez.

LAPU-LAPU CITY



Sa susamang kalambuan, una nang namahayag si Lapu-Lapu City Mayor Junard Chan nga supak sa pagpatuman pagbalik sa lockdown.

Sama sa ubang local chief executives nabalaka si Chan sa dakong epekto niini sa matag Oponganon ilabi na sa panginabuhian.

Masaligon si Chan nga sa higayon nga motuman lang sa health protocol siya nakasiguro nga dili babag ang Covid nga makapadayon sa naandan nilang gimbuhaton ang publiko.

KAPITOLYO



Sa sayo pa, si Cebu Governor Gwendolyn Garcia dakong supak nga pahugtan ang quarantine status sa lalawigan.

Sa iyang press conference sa niadtong Pebrero 19, 2021, siya niingon nga mopadayon ang Lalawigan sa mga ekonomikanhong programa aron makabangon.

Matod ni Garcia nga wa na kinahanglana pa ang pag-isa sa quarantine status kay andam na ang tanang mga pamaagi nga di makakatap ang virus ug duna nay igong mga pasilidad.

Ang Technical Advisory Council (TAC) sa Department of Health Central office nirekomindar nga ipaubos sa enhanced community quarantine ang tibuok Cebu gumikan sa pagsaka sa kaso sa Covid-19 ug ang gikataho nga bag-ong variant sa virus nga gihulagway nga paspas nga makatakod.

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph