WALA makaabot og lima ka kaso sa coronavirus disease (Covid-19) sa Cagayan de Oro human duha ra ka mga residente ang mipositibo sa virus, sumala sa report sa City Health Office sa dakbayan.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,736.
Sumala ni City Health Officer Dr. Lorraine Nery, sa duha ka mga bag-ong lokal nga kaso, usa ang lokal nga authorized person outside residence (Apor) ug usa ang local index nga kaso.
Sa 3,736 nga kinatibuk-ang kaso sa Covid-19 sa syudad, 422 ang mga returning overseas Filipino workers/locally stranded individuals (ROFs/LSIs) ug 3,314 ang mga local transmissions.
Matud ni Nery, sa 3,314 nga mga local nga kaso, 186 ang mga persons deprived of liberty (PDLs), 1,743 ang mga local index cases, ug 1,353 ang mga local cases with link.
Ang Cagayan de Oro adunay 287 ka mga active cases, 41 niini na-admit sa Northern Mindanao Medical Center (NMMC) ug uban pang mga ospital sa syudad ug 246 ang mga outpatients.
Nakatala usab og upat ka mga coronavirus-positive nga mga pasyente, kinsa naka-recover na human nagnegatibo ang resulta sa ilang repeat swab test.
Anaa na karon sa 3,271 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 2,850 ang mga lokal nga kaso (community: 2,409; Apors: 441).
Ang ihap sa mga namatay sa Covid-19 sa syudad naa sa 178.