BIYUDO nga gituohan sa kapulisan nga wa makauyon sa kanta sa videoke sa birthday party nga iyang gitambungan namusil, ug walo ka mga tawo ang nangaangol.
Apan naputos usab siya sa bun-og ug nangalubo ang mga ngipon kay gikulata hinungdan nga apil siyang naospital.
Ang suspek giila sa kapulisan nga si Pablo Iran, 60, taga sityo Kolangsihan, Barangay Lepanto, Alegria.
Samtang naa pa sa tambalanan sila si Camilo Devilla, 35, ulitawo, taga Brgy. Guadalupe, Alegria; Arthur Durango, 23, ulitawo, taga Lepanto; Nilo Lerio, 23, ulitawo; Michael Denuyo, 23; Toni Legarde, 20, ulitawo; Rey Hidalgo, 17; Carlos Baisac, 49; ug Lestor Anthony Devilla, 24.
Si Police Master Sgt. Cyson Obiasada, imbestigador sa Alegria Police Station nga nahinabi sa Superbalita Cebu, nagkanayon nga nagmaoy si Iran gumikan sa kahubog.
Sumala pa niya nga usa ka Junalyn Denuyo, maoy nag-birthday. Kay silingan, si Iran apil sa nangumbera.
Matod ni Obiasada nga udto pa lang sa Martes, nagtagay na sila si Iran ug mga biktima.
Pagka gabii, gikatahong nagmaoy na usab, nagkuha og pugakhang si Iran ug gipunting ang mga biktima.
“Nag-tripping ni siya. Basin wala ni kauyon sa mga gipangkanta sa videoke nila, ani daw ni tawhana mag-maoy, magpabuto dayon,” dugang ni Obiasada.
Gibutyag ni Obiasada nga kanunay maalarma ang mga silingan sa kanunay nga pagpabadlong ni Iran.
“Wala sab namo masalikway nga nasuko ni siya kay wa makakanta, wa hatagi sa microphone namusil,” saysay ni Obiasada.
Si konsehal Lena Licera sa Brgy. Lepanto nga nahinabi sa Superbalita Cebu nagkanayon nga nagtuo sila nga ang mga biktima maoy gipanimaslan ni Iran.
Si Iran dunay gisang-at nga reklamo tulo na ka mga semana ang nakalabay sa barangay human siya gikulata sa mga kabanay sa mga biktima.
Gikatahong wa kini mauyon kabahin sa P500 lang ang mabayad sa mga gireklamo niini.
Si Iran gikatahong nakulatahan sa mga kabanay sa mga biktima.
Si Iran gikatahong hubog, nagmaoy, nanghikap og babaye nga paryente sa mga biktima hinungdan nakulatahan.
“Karon nangalubo pagsamot iyang mga ngipon nausban. Mao na naa pa sa tambalanan,” dugang ni Licera.