MAAYONG adlaw na sad mga super suki! Kumusta ang inyong kahimtang karon?
Daghan ta'g mga kaigsuonan nga nabiktima na pod sa Bagyong Auring didto sa Surigao del Sur.
Panahon pa nga naa ko sa elementarya nasilsil sa akong utok nga agianan gyud sa bagyo ang dapit sa Surigao kay naapil sa typhoon belt.
Niadtong 2020, nasinati sa atong nasud ang napulo ka dagkong bagyo ug baynte tres ka mga trophical storms apan dunay mga katuigan nga nahurot ang tanang letra sa alpabeto sa paggamit nga ginakuhaan sa ngalan sa mga bagyo.
Kon nakabantay mo sa kausaban, sa una mga pangalan lang sa babaye ang ginagamit nga pangalan sa bagyo apan karong bag-o mga pangalan sa lalaki giapil na.
Nadani ko sa pagpaminaw sa programa sa usa ka istasyon sa radyo diin ang mga katawhan puno sa kadasig nga manawag aron ipakuha ang ilang mga hinabang alang sa mga bag-ohay lang nahimong biktima sa Auring.
Pasalamat kita sa mga tawo nga dunay tim-os nga pagbati sa pagkamatinabangon ngadto sa mga naa sa kasakit ug wala nagsalig nga adunay gobyerno nga motubag sa panginahanglan sa katawhan nga biktima sa trahedya.
Linibo, sinako, kinarton ngadto sa ginagmay nga putos nga hinabang gihatag sa katawhan ug gipiyal sa usa ka pribado nga buhatan.
Ang uban kanila nahimo nang regular nga maghatagan sa panawagan sa maong istasyon sa radyo tungod sa ilang pagsalig nga makaabot gyud sa katawhan ang ilang ginatunol nga tabang.
Alang kanila, mao kini ang panahon nga ilang i-kinabuhi ang kinaiya sa pagkamanggihatagon kay mas maayo alang kanila ang pagtabang, kay sa sila maoy tabangan.
Pagkanindot kon sa panahon nga sama ini, atong madungog ang mga pulong nga "Sana all."
Sa mga katawhan nga personal lang nga interest ang ginatan-aw, gamiton gihapon ang panahon aron iduso ang ilang tumong, mangita'g mga sipyat aron himuong isyu aron pagtabon sa maayong buhat, labi na sa kalibutan sa mga politiko.
Sa mga naa sa gobyerno nga mga kurap ug hakog, kawkawon pa ang mga hinabang nga para sa nag-antus nga katawhan, pugngan aron dili makaabot sa natungdan aron madaut ang reputasyon sa nangatungdanan inay nga salbaron, tabangan ang bisan kinsa nga walay pagtan-aw kon kauban ba sila sa panaw o lahi ba ang kolor nga ilang gipasilongan o gipasakopan sa politika.
Dinhi na sab ta sa isyu sa politika.
Daghan ta og nadungog gikan sa mga kontra sa administrasyon ni President Rodrigo Duterte nga nangampanya nga dili kuno maayo magpabakuna kontra sa Covid-19.
Daghan ang ginaingon nga katarungan nganong angay gayud balibaran ang vaccine.
Ang nurse didto sa Estados Unidos nga nakuyapan human gibakunahan, gihimong ehemplo aron mahadlok ang uban kay namatay sumala sa ilang balita apan wala diay.
Nangutang ang gobyerno sa tinguha nga mabakunahan ang katawhan kontra sa virus.
Si VP Lenie Robredo, nabalaka kuno nga nadelatar ang pag-abot sa vaccine sa atong nasud alang sa katawhang Pinoy.
Kon tinud-anay ang iyang kaguol, maayo apan kon ang isyu nga ipaabot sa katawhan mao ang kapalpakan sa mga natungdan nga incharge hinungdan sa pagkalangan aron makabaton na ta sa vaccine, mahimong lahi ang tumong.
Kon kalihukan alang ka kaayohan sa katawhan ug sa nasud angayan nga maghugop ang katawhan sa pagtabang. Ato unta ikaingon, "Sana all"!