GISUBAY na sa mga awtoridad ang posibleng mga suspek sa pagdabdab sa transmission line sa Maguindanao Electric Cooperative (Magelco) alas 9:05 sa gabii Martes, Pebrero 23, 2021.
Sa taho gikan sa Bureau of Fire Protection (BFP) Datu Odin Sinsuat nga kalit lang midilaab ang dakong kalayo sa transmission line sa Barangay Upper Capiton, Datu Odin Sinsuat sa Maguindanao Province.
Naugdaw ang duha ka dagkong power transformer sa Magelco nga maoy hinungdan sa pagkawala sa suplay sa kuryente sa probinsiya.
Nasayran nga sa wala pa nahitabo ang sunog, dunay namatikdan ang mga sibilyan nga duha ka tawo nga nagsakay og motorsiklo nga pagawas sa dapit diin didto nahimutang gitukuran sa transmission line.
Sa pag-imbestiga sa BFP-Maguindanao, dunay nakita sila nga galon nga gilabay nga nanimaho pa og gasolina.
Sentro nga nawad-an sa suplay sa kuryente ang South Upi, North Upi, Datu Odin Sinsuat ug Mother Kabuntalan sa nahisgutang probinsiya.
Gipasalig sa pamunoan sa Magelco nga paspasan nila ang pag-ayo sa naugdaw nga transmission liner o duha ka dagkong power transformer nga gisunog. (Edgar E. Fuerzas)