Nikalit og kahagsa ang power ranking sa Los Angeles Lakers ning semanaha tungod sa sunodsunod nilang kapildihan.
Nakatampo og dako sa ilang nagkutay nga pagkapukan mao ang pagkaangol ni Anthony Davis.
Tiaw mo bay sa lima ka uwahi nilang duwa, kaupat sila mapildi. Human sa ilang kadaugan batok sa Minnesota Timberwolves, gipanitan dayon sila sa Brooklyn Nets, sa Miami Heat ug sa Washington Wizards sa panag-engkuwentro nga miagi og overtime. Kini bisan pa sa pagsulbong sa performance ni LeBron James.
Naobserbahan nga maglisod ang opensa sa Lakers ilabi na og palingkuron si James.
Nagkasaka man tuod ang performance ni Kyle Kuzma, kinsa nag-average na karon og 15.3 points ug 5.7 rebounds ug 39 percent sa 3-point shooting, apan wa kini makapaigo pa.
Kinahanglan magpadayon kini o kaha palabwan pa samtang wa pay katinoan kon kanus-a makabalik si Davis.
Kon sa una, ang Lakers maoy nag-una sa power ranking, karon ni-us-os na ngadto sa ikalimang puwesto.
Ang Utah Jazz nga adunay 25 ka mga daog sa sulod sa 31 ka duwa mao karon ang nag-una ug hugot kini nga gisundan sa Brooklyn Nets.
Sukwahi sa sayong gituohan, mura og mihaom ang sistema sa Nets ngadto ni James Harden nga bisan gani og wala sila si Kyrie Irving ug Kevin Durant iyang mapadaog ang team.
Ang nakanindot sa Nets kay nabantayan nga dali ra diayng makasinabot si Irving ug si Harden bisan og magdungan pa sila og sulod sa korte.
Ikatulo ang Los Angeles Clippers kinsa mibuntog sa Heat bisan pa man og wala si Paul George ug si Kawhi Leonard.
Sa pagbalik ni George ug Leonard, ilang gipildi ang Jazz apan napukan sila sa Nets sa usa ka kontrobersiyal nga duwa.
Tungod sa ilang sitwasyon karon, tinguha sa Lakers nga mahatagan og solusyon kining temporaryong pagkawagtang ni Davis.
Ilang gibuhian ang bench warmer nga si Quinn Cook aron pagluag sa ilang salary cap.
Ilang gitinguha nga mabira og balik ang higanting si DeMarcus Cousin kinsa giingong buhian na usab sa Houston Rockets.
Si Cousins diha na sa Lakers sa niaging season apan wala kini makapakita og saktong labok sa tibuok season tungod sa injury.
So, wa pa makita kon mohaom ba siya sa sistema sa Lakers. Pero bisan pa og mahinayon ni, ang balik-presensiya ni Cousins sa Lakers dili makagarantiya og maayong dagan sa team. Remain to be seen pa.
Ikasawo niya sa puwesto mao man ang mga bigmen nga sila si Marc Gasol ug si Montrez Harrell sa ilawom nga bahin.
Kon si Gasol iyang pulihan, way kausaban sa timplada kay pareho ra man sila hinayon og lihok.
Kon si Harrel sab ang iyang hulipan, mosamot og kalangay ang opensa ug depensa sa Lakers kay duha na silang hinayon og lihok (Gasol ug Cousins).
Sa edad nga 30 anyos, ang 6-10 ug 270 lbs. kinsa nalakip sa NBA All-Star kaupat ka higayon, di pa tantong edaran, apan tungod sa sunodsunod nga injury dili na susama kaniadto ang iyang abilidad.
Apan bisan pa niini, dili ikalimod nga anaa pa kini gamay nga matiti nga posibling mapahimuslan sa team.
Buot pasabot nga magdepende kini sa sitwasyon ilabi na sa krusyal nga mga minutos ug si kinsa usab ang iyang ikauban sulod sa korte.
Sa laktod nga pagkasulti role-player ang iyang papel.
Mao ni butang nga si coach Frank Vogel lang ang nasayod kon kanus-a ug unsaon niya pagpahaom si Cousin sa ilang sistema samtang wala pa si Davis. (jun.migallen22@gmail.com)