Duha ka boxing events ang giandam sa Omega Sports Promotions sa Marso 27, 2021 isip tipik sa ilang Kumbati boxing series sulod sa usa ka bubble sa IPI Compound sa Dakbayan sa Mandaue.
Mao kini ang ikatulong higayon nga mopasiugda og boxing promotion ang Omega sa panahon sa Covid-19 aron mopadayon ang boksing taliwala sa hagit nga gidala sa pandemiya.
Niining tungora, mobida alang sa Omega Boxing mao si Mark Vicelles, kinsa moaway sa beteranong si Arnold Garde sa usa ka 10-rounder bout sa main event sa Kumbati 8.
Ang Kumbati 8 magsugod sa ala una sa hapon apan walay fans nga gitugotang makatan-aw agi’g pagsunod sa national guideline nga gilatad sa panahon sa pandemiya.
Ang 25-anyos nga si Vicelles naghupot og rekord nga 12-0-1, 6KOs samtang si Garde adunay baraha nga 10-10-3, 4KOs.
Ang pambato sa Omega Boxing nga si Vicelles kasamatangang rated No. 9 sa World Boxing Council (WBC) ug World Boxing Organization (WBO) ug No. 13 sa International Boxing Federation (IBF).
Anaa sa co-main event sila TJ Mangubat batok Ryan Maano ug Franco Serafica kontra Mark Rotilles.
Si Pete Apolinar (13-1, 8 Kos) mao pud ang mobida sa Omega Boxing batok Juanito Paredes (8-6-1, 3KOs) sa 10-round fight sa main event sa Kumbati 9 nga sugdan sa alas 7:00 sa gabii.
Ang lumad nga taga Laguna nga si Apolinar gikan unanimous decision nga kadaogan batok Danny Tampipi sa uwahing boxing series sa Kumbati niadtong Disyembre 18, 2020.
Ang head trainer sa Omega Gym Julius Erving Junco nagkanayon nga dako iyang pagsalig sa iyang mga boksidor kay nagsige kini og training sulod sa ilang bubble facility.
Matod ni Junco nga dominasyon ang ilang tuyo niining umaabot nga away.
“January pa lang kabalo na mi ani nga fight. So dili na late notice, ang tanan well prepared gyud. Kahibaw ko akong boxers will prevail with all the training program and support sa Omega and IPI,” batbat ni Junco.
Dako ang pagtuo ni Junco nga mopakita og maayong labok si Apolinar ug Vicelles basi sa ilang performance sa training.
“I’m very proud of them since last promotion they have 100 percent training attendance until now. Now doubt they will be victorious come March 27,” dugang ni Junco.
Ang Omega mibalik og promote og boxing events niadtong Oktubre sa miaging tuig human naundang ang boxing tungod sa hulga sa pandemya.
Ang Omega mao karon ang misawo sa naandang gimbuhaton sa ALA Boxing Promotions nga naahat pagsirado human ningkuyanap og sugod ang pandemya sa kalibutan.