SUGOD sa Marso 1, 2021 kinahanglan na nga magmatngon ang mga motorista sa Dakbayan sa Lapu-Lapu o ba kaha ang mga mangagi sa dakbayan.
Kini human nga momahal na unya ang multa o penalty sa ilang mga traffic violation.
Matod ni Mario Napule, pangulo sa City Traffic Management System (CTMS) sa Dakbayan sa Lapu-Lapu nga ang pagpataas nila sa bayronon sa mga penalty sa traffic violator pinasikad sa giaprobahang ordinansa sa konseho sa dakbayan.
Bisan sayo pa, angay nang masayod ang mga motorista kalabot niini aron dili sila makuratan.
Gikan sa P100 nga penalty kaniadto, ang usa ka traffic violator makabayad na og P500 sa first offense; P600 sa second offense ug P800 sa third offense alang sa minor offense kun mga violation sama sa wa pagsul-ob og helmet kun mag motorsiklo o ba kaha depektoso ang sakyanan.
Samtang alang sa major offense nga may kalabotan sa pagsupak sa mga traffic signs, magtangag na unya og P1,000 sa first offense; P1,500 sa second offense; ug P2,000 sa third offense.
Matod ni Napule, alang kaniya panahon na usab nga patas-an ang multa sa mga traffic violators sanglit di motagam ang mga makasupak sa lagda sa trapiko kaniadto gumikan sa kagamay sa multa.
Ang dakbayan maoy adunay labing barato og penalty sa tulo ka mga syudad sa Metro Cebu.
“Kani penalty ni sa traffic violators so dili ka angay mabalaka ani kay og di ka mo violate, dili ka kabayad ani,” pasabot ni Napule. (GCM)