Misukol sa pulis, patay

DEAD on arrival ang usa ka lalaki human nisukol sa kapulisan atol sa buy bust operation niadtong Oktubre 14 sa kadlawon sa Barangay Cugman, dakbayan sa Cagayan de Oro.

Tulo ka samad pinusilan ang naangkon ni Earl Cabutahe, residente sa Purok 12, Baloy Tablon ning dakbayan.

Sa nahipos nga impormasiyon gikabutyag nga nagpahigayon og operation ang City Drug Enforcement Unit (CDEU) ug kapolisan sa Police Station 10 (PS10) sa Cugman nga gipangulohan ni Police Senior Inspector Rogie Ortencio ug giingong unang nagpabuto si Cabutahe.

Depensa lang sa kaugalingon ang giingong gihimo sa kapulisan kinsa dali nga midala ni Cabutahe sa tambalanan.

Nakuha gikan sa posisyon ni Cabutahe ang caliber .45 nga pistola, bala, gituohang ilegal nga druga, buy-bust money ug uban pa.

Ang patayng lawas ni Cabutahe ang kasamtangang anaa asa morgue sa NMMC.