ANG household transmission kun panimalay mao gihapon ang gitumbok sa Emergency Operation Center (EOC) nga nag-una sa ilang listahan diin nanakod ang coronavirus disease (Covid-19).
Gisundan kini sa trabahoan nga maoy nag-una sa tinubdan sa outside transmission sa virus.
Si Konsehal Joel Garganera, deputy chief implementer sa EOC, nagkanayon nga bisan nisaka ang mga kaso sa Covid-19, apan nikunhod usab ang transmission sa virus sa mga panagtapok ug karenderia nga maoy naglangkob sa 20 porsyento sa Enero nga pagpanakod gawas sa balay.
Base sa data sa EOC nga ilang nakuha pinaagi sa contact tracing niadtong Pebrero 23, ang household transmission adunay 143 ug 43 gikan sa trabahoan.
Ang social gathering ug karenderia aduna nalay tag-usa ka kaso samtang tag-duha ang nataptan gikan sa hospital, dialysis center, kapulisan ug malls.
Ang supermarkets nga nahimutang sagad sa malls adunay 10, public market apil na ang nahimutang sa barangay adunay walo, hospital medical frontliner 14 ug tag-unom ang na-expose sa nakahimamat sa pasyenteng positibo ug laing unom gikan sa mga piniriso.
Ang Siyudad sa Sugbo duna na karoy 3,151 ka aktibong mga kaso sa Pebrero 23, 2021 human nitala og bag-ong 210 ka mga pasyente ang Department of Health (DOH) 7.
Sa 16,672 ka mga kaso sa Covid-19 sa Siyudad, 12,795 ang nangaayo sa mao nga sakit.
Moabot na usab og 726 ang nangamatay.
Dul-an 90 porsyento sa nangasakit asymptomatic. (PAC)