MGA naninda og pungko-pungko bantayan sa kapulisan human nigawas sa contact tracing nga usa sa mga hinungdan sa pagpanakod sa coronavirus disease (Covid-19).
Tungod niini, nisugyot ang kapulisan sa Siyudad sa Sugbo ngadto sa mga kan-anan sama sa pungko-pungko ug mga karenderya nga kon mahimo di na sila magpa dine-in.
Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), nga ila nang gimandoan ang station commanders nga tutukan ang mga pungko-pungko.
“Atong gi-suggest ngadto sa mga namaligya og pungko-pungko nga kon pwede di na sila magpa dine in or kanang mag tuslo-tuslo. Ato nalang na ipabalot ang tanan, bahala na sila (kustomer) kon asa sila mokaon,” matod ni Parilla.
Giklaro ni Parilla nga di nila pasirad-an ang mga pungko-pungko sanglit essential tungod kay mga pagkaon ang gibaligya niini.
Naa, matod pa, mga tawo nga mangaon sa pungko-pungko nga magsawo sa ilang sawsawan diin didto sila motuslo sa suka nga posibling usa sa hinungdan sa pagtakod sa virus.
Aduna nay mga dapit nga adunay naninda og pungko-pungko ang bisitahon sa kapulisan sama sa dalan Llorente sa Capitol Site ug sa usa ka mall sa Fuente Osmeña sa Siyudad sa Sugbo.
Lakip sa giawhag ni Parilla ngadto sa mga karenderya nga ipatuman ang social distancing.
Gipahugtan usab ni Parilla ang Oplan Bulabog bisan kon nagkagamay na lang ang malapason sa quarantine protocol.
Martes sa gabii Pebrero 23, nakatala lang silag 58 nga nangadakpan, 47 niini mga hamtong samtang 11 ang mga menor de edad.
Nakasikop usab sila og 41 ka mga tawo sa paglapas sa curfew ordinance, 11 way mask ug tulo usab ang naabtan nga nag-inom. (AYB)