SUPERBALITA CEBU

Ciar: Mga iconic song, trivia sa Edsa People Power

Super Ka!

ISIP yukbo sa ika-35 nga anibersaryo sa unang Edsa People Power Revolution nga gisaulog karong adlawa, Pebrero 25, atong balikan ang mga awit nga nisikat ug nahimong tipik na sa kasaysayan sa Pilipinas. Hinaot pinaagi niini subling mabanhaw ang diwa sa Edsa ug ang atong interes sa mga bayaning Pilipino nga giula ang dugo sa ngalan sa kagawasan nga daw nakalimtan na sa bag-ong henerasyon. (Dugang impormasyon nakutlo gikan sa officialgazette.gov.ph, Wikipedia ug Inquirer.net)

“BAYAN KO”

“Pilipinas kong minumutya/ Pugad ng luha at dalita/ Aking adhika/ Makita kang sakdal laya.”

Ang “Bayan Ko” unang gi-record ni Freddie Aguilar niadtong 1978. Apan gamay ra tingali ang nasayud sa mga milenyal karon nga wa pa intawon matawo ang inyong mga lola ug lolo aning kantaha.

Ang “Bayan Ko” gikan sa Spanish poem nga “Nuestra Patria” (Our Homeland) nga gitagik sa Revolutionary General Jose Alejandrino niadtong 1898.

Gihubad ni sa Tagalog paglabay sa tulo ka dekada ni Jose Corazon de Jesus base sa musika ni Constancio de Guzman isip protest song dihang giokupar sa mga Amerikano ang Pilipinas.

Ang maong awit nahimong saksi sa daghang mga rebolusyon bisan niadtong panahon sa Hapon atol sa ikaduhang giyera sa kalibutan.

Ang “Bayan Ko” subling nabanhaw dihang gikanta ni Ka Freddie ang maong awit sa haya ni Senador Benigno “Ninoy” Aquino Jr. niadtong Agusto, 1983 ug maoy gigamit nga kanta sa mga opposition batok sa diktadoryang Marcos.

“MAGKAISA”

Ang “Magkaisa” ang laing anthemic song sa Edsa People Power Revolution.

Gi-compose ni sa senador na karon nga si Vicente “Tito” Sotto sud lang sa tulo ka oras sa tabang sa arranger nga si Homer Flores ug record producer Ernie de la Peña (composer sa “May Bukas Pa” ug “Lupa”). Gikanta ni sa 20-anyos ug bagitong singer pa lang niadto nga si Virna Lisa Loberiza.

Butyag pa ni Sotto sa interbyu sa kaulohan nga nikuha siya og dili sikat nga mag-aawit kay gusto niya ang focus naa ra sa kanta ug dili sa singer. Ang mga ginikanan ni Virna suod sa mga Sotto.

Nadawat ni Virna ang demo tape sa “Magkaisa” nianang udto sa Marso 1, 1986 ug gi-record dayon nila ni pagkagabii. Ang back-up singers mao silang Vic Sotto, Bambi Bonus ug Babsie Molina.

Nahuman ang recording alas 5 na sa buntag ug pagka-alas 10 sa susamang adlaw gipagawas dayon ang music video sa telebisyon.

Si Virna tua na karon nagbase sa Virginia, USA kauban ang iyang tulo ka mga anak. Ang “Magkaisa” gikanta usab ni Sarah Geronimo sa haya ni kanhi presidente Cory Aquino niadtong Agusto 5, 2009.

“TIE A YELLOW RIBBON”

Nasayod ba mo nga ang paboritong kolor ni anhing Cory Aquino dili yellow?

Sa Enero 1987 interbyu sa Time Magazine gibutyag ni Cory nga puwa gyud ang kinaham niyang kolor.

Apan nadani siya sa yellow dihang nisugyot si kanhi senador Eva Estrada-Kalaw nga gamitong homecoming song ang “Tie A Yellow Ribbon” alang sa mopauliay nang si Ninoy niadtong higayona human sa tulo ka tuig niining self-imposed exile sa Amerika.

“Tie a yellow ribbon `round the ole oak tree. It’s been three long years. Do you still want me?”

Apan imbes mananoy nga musika ang mabati maoy nilanog ang makalilisang nga mga masipang boto sa armas niadtong Agusto 21, 1983 nga nikutlo sa kinabuhi sa senador diha sa tarmac sa kanhi Manila International Airport. Ug dinhi nakita sa unang higayon sa rehimeng Marcos ang gahum sa “dilawan.”

Ang “Tie A Yellow Ribbon” unang gipasikat sa American pop music group nga Tony Orlando and Dawn niadtong 1973.

HANDOG NG PILIPINO SA MUNDO

“Handog ng Pilipino sa mundo / Mapayapang paraang pagbabago...”

Ang “Handog ng Pilipino sa Mundo” gi-composed ni Jim Paredes sa Apo Hiking Society duha ka buwan human sa rebolusyon ug orihinal nga gikanta sa Apo uban sa laing 14 ka mga artist nga naglakip nilang Celeste Legaspi, Ivy Violan, Kuh Ledesma, Leah Navarro, Inang Laya, Coritha and Eric, Noel Trinidad, Subas Herrero, ug Gretchen Barretto nga 16 anyos lang niadtong higayona.

Gi-release ni sa Wea Records nga karon Universal Records na, diin ang tipik sa kita gitabang sa pagpaayo sa transmitter sa Radio Veritas nga nadaut atol sa pagkuber nila sa rebolusyon.

Ang mga titik sa maong awit nakakulit hangtod karon sa pader sa Our Lady of Edsa Shrine.

“MAMBO MAGSAYSAY”

Ang “Mambo Magsaysay” ang laing iconic song nga nabanhaw atol sa People Power Revolution dihang gibalikbalik ni og patukar sa brodkaster nga si June Keithley-Castro atol sa iyang 14 ka oras nga non-stop broadcast.

Ang “Mambo Magsaysay” unang gigamit ni Ramon Magsaysay isip campaign jingle niadtong 1950s dihang nilansar ni sa pagka-presidente nga gi-composed sa pulitikong si Raul Manglapus.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!