USA mga gitumbok nga hinungdan sa pagkalangay sa pagpalit sa gobyerno nasyonal sa mga bakuna batok sa Covid-19 mao ang kakuwang sa indeminification fund. Ang gobyerno nipirma og indemnification agreement sa mga manufacturers sa bakuna aron wa silay tulubagon kon unsay mahitabo sa gipangbakunahan.
Mora’g nanghunaw nang daan ang mga pharmaceutical companies nga naggama sa mga bakuna batok sa Covid-19. Gawas pa, ang pagtugot nga gihatag kanila mao lang ang gitawag nga emergency use authorization (EUA) tungod kay di pa kompleto ang ilang clinical trials.
Mao kini ang hinungdan nga gipasar sa House of Representatives ug sa Senado sa sayo pa ning semanaha ang Emergency Vaccine Procurement Act (EVPA) aron madali ang pagpalit sa mga bakuna.
Adunay nangutana nganong karon lang milihok ang gobyerno niini, nganong wa man dayon kini ipasar sa Kongreso kaniadto pa aron madali unta ang pagpalit sa mga bakuna. Ang ilang katarungan mao nga gipahibawo ang gobyerno niini nga rikisito sa talitapos na ang negosasyon sa pagpalit sa mga bakuna.
Ubos sa EVPA, nigahin ang Kongresso og P500 milyones nga pundo aron ibayad niadtong mga tawo nga mahiagom sa mga side effects o di maayong epekto sa bakuna batok sa Covid-19.
Nagtugot usab kini sa mga lokal nga kagamhanan sa pagpalit og bakuna alang sa ilang mga constituents. Ang mga local government units (LGUs) gitugotan na sa pagdawat og donasyon sa bakuna ug pagpalit diretso gikan sa mga manufacturers apan hangtod lang sa 50 porsento sa ilang tagsa-tagsa ka populasyon.
Ang pribadong sektor nga gustong mopalit og bakuna batok sa Covid-19 kinahanglan pang moagi sa Department of Health. Samtang way tulubagon ang opisyal ug kawani sa gobyerno, mga contractors, volunteers ug representante sa pribadong sektor sa bisan unsang epekto sa pagbakuna. Apan manubag sila kon ang hinungdan mao ang “willful misconduct and gross negligence.”
Kon mapirmahan na sa presidente ang balaudnon nga gipasar sa Kongreso, mamugna ang usa ka COVID-19 National Vaccine Indemnity Fund nga dunay pundo nga P500 milyones, dugang sa pundo sa Philippine Health Insurance Corporation (PhilHealth). Ang pundo kuhaon gikan sa contingency fund sa P4.5 trilyones nga 2021 national budget.
Kadtong tawo nga mahiagom sa serious adverse effects nga wa mahilantawi o wa damha nga epekto sa bakuna batok sa Covid-19 gihatagan og lima ka tuig sa pag-file og claim alang sa indemnification gikan sa adlaw sa pagbakuna kaniya.
Ang maong balaudnon magmugna usab sa usa ka vaccine passport program nga maoy himuong record sa nadawat nga bakuna sa usa ka tawo batok sa Covid-19. Dugang niini, gipadali ang pagpalit sa mga bakuna pinaagi sa paghatag og exemption sa public bidding ug sa pagbayad og mga buhis.
Sa ato pa mapalit ang mga bakuna batok sa Covid-19 pinaagi sa gitawag nga “negotiated procurement under emergency cases.” (edbarrita@gmail.com)