NAGSUGOD na ang pagpamakuna sa ubang mga nasod samtang sa Pilipinas wala pa, apan gauna ang ubang mga opisyal sa kagamhanan kon basehan ang sulti ni Presidente Rodrigo Duterte ug sa usa ka media personality nga nailang kaalyado sa administrasyon karon.
Matod sa Department of Health (DOH) nga dunay bakuna nga mangabot dinhi sa nasod sa di pa matapos ang Pebrero. Apan prayoridad ang frontliners, labina sa mga naa sa medical ug security, sama sa mga pulis ug sundawo.
Samtang nagpadayon ang pagpamakuna sa mga silingang nasod sa Pilipinas, gilalisan pa kon ibutang ba sa modified general community quarantine (MGCQ) ang tanang lugar o di, bisan pag nagsaka ang mga kaso sa coronavirus disease (Covid-19) sa usa ka lokalidad.
Mao usab ni ang nahitabo dihang nisugod nag kuyanap ang Covid-19 sa mga silingang nasod, labina sa China. Nagpanagana si Duterte ug ubang mga opisyal sa nasod sa pagsirado sa mga utlanan kay basin masuko ang silingan. Uwahi na dihang ang tanang flights sa China gi-ban kay nakasulod na ang mga nagdala og virus, nakasuroy pa sa tourist destinations sa Cebu, Bohol ug Negros.
Ang gidaghanon sa mapalit nga mga bakuna sa nasudnong kagamhanan mabana-bana man. Mahibaw-an usab ang gidaghanon sa kaya niining mahatag sa mga lokalidad. Dinhi unta magsukad ang mga local government unit (LGU) sa paggahin og pundo aron ipamalit og mga bakuna.
Sama sa Dakbayan sa Sugbo nga nagtagana na og pundo alang sa pagpalit og bakuna. Angay unta nga ning higayuna duna nay particular nga pharmaceutical company nga gikasabot sa administrasyon ni Mayor Edgardo Labella alang sa pila ka bakuna ang paliton, di kay maghuwat una kon pilay mahatag sa Malacañang dinhi sa dakbayan. Kon huwaton pang Malacañang, hayan 2022 pa mabakunahan ang mga Sugboanon. Anang higayuna, lup-og nang ekonomiya sa pagsigeg huwat kay bakuna ray makabuhi sa normal ug kompyansa sa komunidad.