Kombento sa St. Joseph Parish sa Barangay Tabunok, Dakbayan sa Talisay gilungkab sa tulo ka mga tawo mga alas 4 sa Huwebes sa kaadlawon, Pebrero 25, 2021.
Tulo ka batan-ong mga lalake nakuha sa closed circuit television (CCTV) camera nga nangawat sa sulod, apan di parokya ang nakuhaan, kon di mga trabahante niini.
Kapin sa P50,000 ang nasakiyo sa mga kawatan nga iya sa tulo ka mga trabahante sa simbahan nga nag-alkansiya sa ilang mga tinigom.
Sa CCTV footage nga gipakita sa kapulisan sa dakbayan, makita ang tulo ka mga lalake nga yanong naglakaw padulong sa gate.
Bisan gikandaduhan ang gate, nakahimo pagsulod ang tulo ka wa pa mailhing kawatan pinaagi sa pagkatkat.
Gikan sa gate, nakasulod ang usa pinaagi sa sliding window dayon nisunod usab ang usa ka kauban samtang ang ikatulo nagsilbeng lookout.
Ang usa ka alkansiya dunay P30,000 nga sulod samtang tag P10,000 kapin ang iyaha sa laing duh aka mga kawani.
Matod ni Police Corporal Clifford Lerio, imbestigador sa Talisay City Police Station, nga dako og matabang sa pag-ila sa tulo ka mga kawatan ang kuha sa CCTV. (REV)