Mibalik na sa iyang trabaho si Talisay City Mayor Gerald Anthony “Samsam” Gullas, Jr. human sa iyang 14 ka adlaw nga quarantine.
Apan nakahukom una siyang di mouli sa ilang balay kay iya unang huwaton nga molapas ang 21 ka adlaw aron maseguro ang kaluwasan sa panglawas sa iyang anak nga babaye.
Kini bisan kon gisultihan na siya sa iyang mga doktor nga mahimo na siyang makabalik sa pagtrabaho.
“My doctor told me that according sa studies, 96% of Covid patients are no longer infectious after 10 days. 98% no longer infectious on the 14th. And 99% on the 21st. And 100% on the 28th,” matod sa mayor.
Sa samang higayon, gipadayag ni Gullas ang iyang pagsupak sa lockdown, kay alang kaniya, gikinahanglan nga mobangon na ang ekonomiya bisan kon naa pa ang pagpanakod sa coronavirus disease (Covid-19).
Iya hinuong giawhag ang mga Talisaynon sa pagtuman kanunay sa mga health protocol.
“Kuyog ko ninyo when I say no to lockdowns. Trust me, gikapoy nasad ko ani. We have to get the economy back on track, but kita mismo sad dapat dibdibon ang health protocols. Only then we will improve,” matod ni Gullas.
Matod ni Gullas nga gikinahanglan ang kooperasyon sa matag usa pinaagi sa pagtuman kanunay sa mga health protocol kay di makaya sa kagamhanan nga mag-inusara sa pagkombate sa Covid-19.
Gikinahanglan ang kanunay nga pagsul-ob sa facemask, face shield ug mintinahon kanunay ang physical distancing, matod sa mayor.
Iyang gipasalamatan ang mga doktor nga nag-atiman kaniya kay siya mismo nakakita sa mga sakripisyo dihang na-admit siya sa tambalanan sayo ning buwana human magpositibo sa Covid-19.
“I am a true witness of how our doctors and nurses work when didto ko sa hospital. Katong didto ko sa hospital, they literally put their lives in danger to save others. Thank you,” dugang ni Gullas.
Sa samang higayon, si Gullas nipasalamat kang Bise Mayor Alan Bucao sa pagdala sa ryenda sa pangagamhanan samtang wa siya.
Si Gullas nagpaospital niadtong Pebrero 10, 2021 human siya makasinati og mga simtomas sa Covid-19 usa ka adlaw sa wa pa siya moadto sa tambalanan. (REV)