NANGMINGHOY sa Toril Police Station ang siyam ka mga sabongero human nasikop sa kapulisan atol sa gihimong ronda alas 3 sa hapon, Miyerkules, Pebrero 24, 2021.
Wala na kadagan ang siyam ka sabongero dihang anaa na ang Toril police sa ilang palibot sa panguna ni Police Major Michael Uyanguren.
Una niini, miabot ang impormasyon sa kapulisan nga dunay tigbakay sa Purok 8, Barangay Bayabas, Toril District, Davao City hinungdan nga giambakan dayon sa mga pulis.
Sa dapit, naabtan sa mga pulis ang siyam, diin nakumpiska sa ilang posisyon ang unom ka mga manok pangsabong, duha ang buhi nga sunoy, upat ka bihag, hantugan, ug salapi nga P1,400 nga ilang pusta.
Pasakaan og kasong kalapasan sa Presidential Decree 1602 kun illegal gambling ang mga suspek. (Jeepy P. Compio)