SUPERBALITA DAVAO

DCPO giduka; militante way kisaw

Hulagway iya ni Jeepy P. Compio

DAKO ang kabag-ohan sa mga miaging katuigan, human magduha ka tuig nang susama ang sitwasiyon sa Freedom Park sa Davao City — mingaw pa sa menteryo ang kanhi perte ka yagaw kung dunay mga selebrasyon nga kasumaran nga sama sa Edsa People Power Revolution anniversary.

Huwebes, Pebrero 25, 2021m maoy ika-35th katuig kasumaran sa Edsa People Power Revolution, mingaw ang Freedom Park, walay mga militante nga sama niadto magsininggitay sa parke, dala ang mga plakards uban sa pagbatikos sa nagdala sa renda sa gobyerno.

Bisan anaa ang balaod nga "Anti-Terrorism Act of 2020" kun ang Republic Act No. 11479, gihatagan gihapon og dakong kahigayonan sa awtoridad ang si bisan kinsa nga mopadayag sa mulo apan anaa lamang sa malinawon nga pamaagi.

Sa Davao City, ang kapulisan nagplastar og 50 ka mga lingkuranan sa Freedom Park alang sa mga militante nga buot mopadayag sa ilang suhestiyon batok sa gobyerno.

Apan alang ni Alliance of Concerned Teachers-Davao City (ACT-Davao City) division president Reynaldo Pardillo nga dili na angay mosinggit sa kadalanan, gumikan suma niya ang tinuod nga kadaugan sa Edsa mao kadtong paghinumdom sa kagahapon kon unsa ang tinuod nga kasingkasing sa nagmulo nga katawhan nga angay mabati sa gobyerno.

"Edsa is the part of our history naman lang gyod, apan sa karon di na kinahanglan moanha pa ka sa kadalanan aron mabati sa gobyerno ang mga mulo... mismong ang gobyerno na ang motan-aw unta kung unsa ang kakuwangon labi na sa pundok sa mga magtutudlo — kana ang tinuod nga kagawasan nga maoy diwa sa paghandom matag tuig sa Edsa Revolution," ingon ni Pardillo nga nahinabi sa Superbalita Davao pinaagi sa telepono Huwebes.

Sa post sa social media sa mga lingkuranan nga giplastar sa DCPO, dihay mga komento nga gilangaw na lang ang mga lingkuranan kay wa gyoy nangabot nga mga militante.

Naabtan na lang og hapon walay nanguna sa rally sa Davao City. Mingaw sab ang kuwerpo sa kapulisan ug walay natala nga dagkong mga panghitabo sa dakbayan. (Jeepy P. Compio)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph