NAGTUO ang mga bakwit sa linog sa Makilala, North Cotabato nga gisuyop sa aswang ang dugo sa bata nga maoy hinungdan sa iyang kamatayon niadtong miaging adlaw.
Matud ni alyas Melda nga nagpuyo sa Flortam evacuation site sa Sitio Flortam, Barangay Batasan sa maong lungsod nga gi-aswang ang iyang anak.
Gihulagway nga ang iyang anak dunay kinawrasan sa lawas ug matag gabii ilang mamatikdan nga daw dunay galupad-lupad nga dakong langgam sa ilang tulda (tent).
Samtang gidason sa usa ka Marilyn, kauban ni alyas Melda sa tulda nga niadtong mga orasa bandang alas 11:00 sa gabii, nakabati sila og tingog sa kikik nagsakdap-sakdap.
Sa diha nga ilang gitan-aw ang bata duna na kiniy kinawrasan kilid sa iyang lawas ug sa tiyan nga gituohan nila nga gi-aswang.
Wala na mabuntagan ang bata human nakabsan kini sa iyang kinabuhi.
Apan si Barangay Batasan Kapitan Rable Ramirez nag-ingon nga dengue ang gikamatyan sa bata base sa paghiling sa mga doktor ug mga barangay health workers.
Gidugag ni Ramirez nga siyam na ka bata ang nagkasakit sa dengue sa Flortam evacuation site nga temporaryo nga gipuy-an sa mga bakwit nga nawad-an og mga balay sa milabay nga linog.
Hangtud karon ang mga bakwit nagtuo gyud nga biktima sa aswang ang bata nga maoy hinungdan sa iyang kamatayon.