Gipanghingusgan na sa Traffic Enforcement Agency of Mandaue City (Team) ang pag-isyu og citation ticket ngadto sa mga trailer ug mga truck driver kinsang mga sakyanan lapukon og mga ligid.
Kini isip pagpatuman sa Section 2 sa City Ordinance no. 14-12017-1223 nga nagdili sa pagdagan ang mga container trucks ug uban pang mga sakyanan sa national ug city roads kon lapokon ang ligid.
Sa Huwebes lang sa buntag, Pebrero 25, 2021, tulo ka mga trak ang ilang napara ug nadakpan. Sukad sa Enero ning tuiga, 20 na ka mga trak ang ilang nasikop ug gipamulta ang drivers.
Ang kalapasan dunay P1,000 nga multa.
Matod ni Edwin Jumao-as, pangu sa Team, nga ilang gipanghingusgan ang pagpatuman sa ordinansa karong tuiga human nila makita nga daghang mga trailer truck ug container trucks ang modagan nga lapok ang mga ligid.
Sigon niya nga gidili ang pagpadagan sa mga sakyanan kansang mga ligid lapukon kay moresulta kini sa grabe nga abog sa panahon nga mouga na ang lapok.
Mao sab kini ang sagad hinungdan nga madisgrasya ang mga motorsiklo tungod kay ma-slide.
Kasagaran sa mga trak nga nasikop naa sa cargo corridor sa Dakbayan sa Mandaue nga mao ang Zuellig St., A.C Cortes St. sa may University of Cebu Lapu-Lapu-Mandaue Campus (UC-LM) sa may approach sa unang Mactan bridge, ug D.M. Cortes paingon na sa Cansaga Bridge.
Ang karsada sa may atubangan sa UC-LM gireklamo na sa daghang mga motorista ug netizens tungod sa kaabog panahon sa ting-init. Kini tungod sa pag-agi sa mga trak nga lapok ang mga ligid.
Aron mahibawo ang truck drivers sa ordinansa, nipadala si Jumao-as og pahimangno ngadto sa mga kompaniya sa mga cargo truck kabahin sa ordinansa sa miaging semana.
Gani, makigtagbo sab si Jumao-as sa mga kompaniya sa truck nga anaa sa Barangay Opao kauban ang mga opisyal sa barangay aron hisgotan kini.
Miingon si Jumao-as nga muhatag sila og suhestyon ngadto sa mga kompanya nga una mugawas ang ilang truck sa highway, kinahanglan nga husgasan ang lapok nga ligid og pressure washer.
Sigon ni Jumao-as nga ang paghunong sa mga truck aron paghugas sa ligid di makaapekto sa dagan sa trapiko tungod kay kadiyot ra kini buhaton.