Kon ang ubang establisemento nanira resulta sa pandemiya, adunay bag-ong restobar sa Barangay Maribago, Dakbayan sa Lapu-Lapu ang nagbukas niadtong Hulyo 28, 2020.
Ang maong bag-ong chill spot ginganlan og LaPlace Veranda nga gipanag-iya ni Jennylyn Ubay uban sa iyang partner nga si Grant Dundon.
Ang orihinal nga konsepto sa maong dapit adunay mga paabangan nga guest house diin ilang gi-cater mga international client apan tungod sa Covid scare wa nay guest ang nangabot.
Nakahukom si Jennylyn nga moabli og establisemento aron nga magpadayon ang ilang panginabuhian.
RELAXING
Garbo sa management sa LaPlace Veranda ang unique nga set-up sa ilang lugar kay open air kini nga gilibutan og dagkong kahoy ug mga tanom.
Nakuha ang maong konsepto sa paghingalan og veranda tungod kay extension kini sa nataran o veranda sa balay nila ni Ubay nga anaa ra sab sud sa compound.
Sukwahi sa ubang establisemento nga anaa sud sa usa ka edipisyo o anaa lang sud sa lawak.
“Island vibe ang among theme,” paghulagway ni Winston, manager sa LaPlace Veranda.
Maisip sab ang LaPlace nga sportsbar kay adunay billiard table nga mapahimuslan sa mga customer.
ALL IN ONE
Giklaro ni Winston nga dili lang imnanan ang ilang dapit, haom sab kini for all ages nilang customer tungod kay nag-offer sila og breakfast, lunch ug dinner nga patok sa barkada o pamilya.
Sumala pa ni Winston nga kaniadto ang karaang LaPlace sagad maoy dagsaan sa mga expat diin sila mag-unwind.
“We want to tap the Filipino crowd,” sey pa ni Winston diin naila ang LaPlace sa mga international cuisine.
Tungod niini ilang gidugang sa ilang menu ang mga pagkaon nga “lutong bahay” kon Filipino dishes.
Lakip na niini ang kinaham nga nilat-ang baka, menudo, bihon espesyal, buwad bolinao, buwad pinakas nga gikamatisan, nagkadaiyang variants sa silog, ug naa gihapon ang ilang signature pizza, fish and chips ug burger ingon man ang ilang rib eyed steak, salmon ug uban pa.
“The price range is pretty much affordable like P200, P300. Gawas sa premium dish sama sa steak,” pasabot ni Winston.
Dugang pa ni Jennylyn kon alang sa uban pricey ang presyo sa uban nilang putahe apan dinaghan ang serving nga mamahimong sawhan sa duha ngadto sa upat ka tawo tungod kay platter ang ilang serving.
Nagserve gihapon sila og drinks sama sa cocktail ug mocktails.
PROMO
Sa mga nag-budget adunay promo nga gi-offer ang LaPlace Veranda diin sa matag adlawng Sabado gikan sa 7:00pm ngadto na sa 9:00pm libre ang ilimnong Margarita for ladies only.
Aduna say everyday unlimited Margarita cocktail for P500 sud lang sa duha ka oras.
Samtang ang ilang rhum coke tag-P50 ang order gikan sa 5:00 sa hapon ngadto nga sa 7:00pm.
Dili sab la-ayon ang mga customer tungod kay matag Biyernes gikan sa 6:30pm – 9:00pm acoustic night.
Alang sa dugang inpormasyon o promos nga ilang gi-offer mamahimong moduaw sa ilang official Facebook page nga LaPlace Veranda, ug mga nag-plano nga mo-dine in ilabi na large group message
lang alang sa inyong reservation.
UNSAON PAG-ADTO?
Sayon ra sab matultolan ang LaPlace tungod kay daplin ra sa kalsada sa Maribago kon magsubay sa M.L. Querzon Highway.
Gibana-bana nga 15 minutos nga biyahe kon manukad sa Mactan-Mandaue ug Marcelo Fernan Bridge.
Sa way mga kaugalingong sakyanan accessible sab ang lugar sa mga PUVs.