Sa giingong misencounter tali sa kapulisan sa Quezon City ug Philippine Drug Enforcement Agency (PDEA) 7, duha ka mga pulis ang patay ug usa ang samdan nga naa sa kritikal nga kahimtang. Duna say samdan sa habig sa PDEA sa engkwentro sa dayon nang gabii sa Miyerkules.
Gihulagway nga usa ka buy-bust ang gihimo sa kapulisan busa legal ang ilang gihimo. Matod sa PDEA, lehitimo usab ang ilang operasyon.
Sa buy-bust, dunay seller ug buyer. Sagad sa mga buy-bust, ang mga durugista ang mamaligya samtang ang mga awtoridad mamalit. Ang bad guy maoy mamaligya sagad. Sa mao nga transksyon, kinsa kaha ang namaligya?
Masayran kini pinaagi sa gitukod nga board of inquiry nga mosusi sa misencounter.
Dugay na ang mga estorya nga dunay hiwi nga mga sakop ang kapulisan ug PDEA. Mao bitaw nga naglisod pagtuo ang publiko nga tinud-anay ang gidaghanon sa illegal drugs nga nasakmit tungod sa kalaki ra usab ang hiwi nilang mga ginsakpan. Hangtod karon nagtuo ang publiko nga gi-recycle ang drugas hinungdan nga way hubashubas.
Binilyon na ang balor sa illegal drugs nga nasakmit. Liboan na ang napatay sa mga anti-illegal drug operation, apan wa mohubas ang illegal drugs. Kinilo na man gani hinuon ang nasakmit.
Di lang diay pagpatay sa mga illegal drug operator ang sulusyon kay lawom kaayo ang problema sa illegal drugs kay nakagamot na kini pag-ayo. Bisan pag hutdon og patay ang mga drug lord ug buhion ang death penalty, di kini mawagtang. Pakyas man gani ang Estados Unidos sa iyang kombate batok sa illegal drugs.
Gikinahanglan diay nga anha sa gamot magsugod, diha sa matag pamilya ug barangay. Kon ang pamilya ug komunidad dunay tiunay nga pagsalmot tungod sa pagsalig ini sa mga awtoridad, mag-anam ra og kamatay ang illegal. Apan unsaon man pagkuha sa pagsalig kon mismo ang mga awtoridad di kasaligan?