Lig-on gyud ang baruganan ni Gov. Gwen Garcia nga iya nga supakon kon ibutang pagbalik ang lalawigan sa Sugbo sa lockdown. Niadtong miaging adlaw, nipagawas siya sa Executive Order No. 12 nga magwagtang na sa RT-PCR o swab test result isip usa sa mga rekisitos sa pagsulod sa mga turista dinhi sa lalawigan. Siya maoy unang mi-relax sa mga requirements gumikan sa iyang tumong ug tinguha nga mabuhi pagbalik ang turismo sa lalawigan gumikan kay daghang kaayong naapektuhan sa ilang panginabuhian.
Daghan ang misaway sa gobernador, labi pa ang mga health expert, gumikan sa iyang desisyon nga posibleng mao unyay hinungdan nga padayong mosaka ang mga kaso sa Covid 19. Apan determinado ang gobernador. Ang gikinahanglan lang sa mga turista mao ang medical health certificate nga gikan sa ka doktor nga iisyu pito ka adlaw sa dili pa mobiyahi. Booking sa hotel o resort nga diin sila mo-estar ug mopasar sa Covid 19 symptoms checking. Panginabuhi ug ekonomiya ang gihatagan og pagtagad sa gobernador. Total naa man gihapon ang pagsagop sa mga minimum health protocols.
Sukad pa sa Oktubre 2020 gisugdan na sa gobernador ang pagpaluag sa mga rekisito sa pagbiyahe sa katawhan sa probinsiya. Gitumong kini aron sa pagbuhi sa turismo nga maayong pagkahagba gumikan sa pandemiya. Niadtong 2019, dunay suma total nga dul-an sa 10 milyones ka turista nanuroy sa Sugbo, diin kapin sa lima ka milyon niini mga lokal nga turista. Atong masabot nga maoy gipaningkamotan sa gobernador nga madasig ang mga lokal nga turista nga makahinay-hinay pagbuhi sa turismo. Ug kining iyang baruganan nga paluagan ang rekisitos nahitabo pa ning panahon nga nagsaka ang mga kaso sa Sugbo ug wala pay nakita nga bakuna. Tingali ang naghinobra nga optimism o paglaum sa gobernador maoy labing gikinahanglan nato karong panahona.
Taliwala sa tumang kabalaka ug kakulba gumikan sa pandemiya, ang optimism sa atong mga lider adunay mahimo. Ug kini mao ang paghatag kanatong tanan og paglaum. Kay matod pa bitaw sa bantugang kanhi primero ministro sa Britanya nga si Winston Churchill: “A pessimist sees the difficulty in every opportunity and an optimist sees opportunity in every difficulty.”
(bobbygnalzaro@gmail.com)