Gipaniguro sa mga opisyal sa Philippine Drug Enforcement Agency (PDEA) 7 ug sa kapulisan sa Siyudad sa Sugbo nga dili mahitabo ang misencounter sa duha ka ahensya sama sa
Quezon City nga miresulta sa kamatayon sa duha ka mga pulis ug miangol og usa ka ahente sa PDEA.
Matod ni PDEA 7 Director Levi Ortiz nga ang matag panahon sa ilang anti-drug operation bisan sila maoy lead agency apan kanunay sila nga makig-alayon sa kapulisan.
Iyang gipasabot nga sukad namugna ang PDEA walay insidente sa Central Visayas nga hapit magkapinusilay ang mga pulis ug ilang ahente.
Wala na siya mokomento sa unsay posibling nahitabo niadtong hapon sa Pebrero 24, nga nagkapinusilay ang mga pulis ug mga ahente sa PDEA tungod kay mopagawas og pamahayag ang ilang Director General nga si Wilkins Villanueva.
Dugang niya, ang nahitabo sa Quezon dili makaapekto sa relasyon sa Philippine National Police (PNP).
Mao usab kini ang pamahayag ni Police Colonel Josefino Ligan, hepe sa Cebu City Police Office (CCPO).
Matod ni Ligan, isolated ang nahitabo sa kaulohan ug dili kini mahitabo sanglit maayo ang kooperasyon sa PDEA 7 ug kapulisan ilabi na sa ilang matag anti drug operation.
Gibutyag ni Ligan nga aron malikayan ang misencounter adunay coordination nga himuon ang police unit ngadto sa PDEA aron masayod kini nga sa usa ka lugar adunay gilusad nga operation.
“Before gyud ta mo conduct og anti illegal drug operation, coordinated na siya sa PDEA aron malikayan ang misencounter,” matod ni Ligan.
Una nang mitug-an ang team leader sa Quezon City Police District nga mihimo silag buy-bust apan ang PDEA miangkon usab nga sila ang mipahigayon sa buy-bust.
Tungod niini, ang Criminal Investigation and Detection Group (CIDG) ang gitahasan ni Police General Debold Sinas nga mohimo og imbestigasyon nganong niresulta sa misencounter ang anti-drug operation sa duha ka ahensya. (AYB)