Ang Cebu City Government pinaagi sa Department of Manpower Development and Placement (DMDP) nipahigayon og online jobs fair nga gisalmotan sa labing minos unom ka mga kompaniya.
Si Sheila May Daluz, officer-in-charge (OIC) sa DMDP, nagkanayon nga aduna silay 226 ka mga aplikante ang daan nagparehistro, 50 ang nainterbyu sa employer samtang 12 ang hired on the spot atol sa ika-84 nga Charter Day celebration sa dakbayan niadtong Pebrero 24.
Ang Cebu City maoy labing unang local government unit (LGU) nga nakapahigayon og online jobs fair ug nakigtambayayong sa Department of Labor and Employment (Dole) 7. Ang Cebu City maoy pilot study sa Dole para sa local government unit (LGU) level.
Matod ni Mayor Edgardo Labella, gihingusgan karon sa siyudad ang paggamit sa teknolohiya para pagtanyag og kahigayonan sa panarbaho sa mga Sugbuanon agi og paghangop sa new normal gumikan sa pandemya.
“Let me recognize the companies that joined yesterday’s job fair, including Cebu General Services, Concentrix, Dunkin Donuts, Primary Structures, Teletech and WiPro, providing over 1,000 job vacancies,” padayag ni Labella.
Ang mayor nagpasalamat kang Daluz, usa sa Mayor’s special awardees sa 84th Charter Day, ug ni Jessica Uy, employment officer sa Dole 7.
Ang DMDP nangamdan na usab karon para sa sa laing virtual jobs fair nga ipahigayon atol sa Labor Day, Mayo 1. (PAC)