Nasolusyonan na ang dugay nang suliran sa kuryente sa Isla sa Olango, Dakbayan sa Lapu-Lapu human pormal nang gipaandar sa Huwebes, Pebrero 25, 2021, ang bag-ong Olango Power Plant sa isla nga iya sa Total Power Inc.
Gipangunayan ni Mayor Junard Chan ug mga kadagkuan sa Total Powerang pormal nga pagpaandar sa planta sa kuryente.
Ang planta makahatag og moabot sa 3,600 kilowatts nga supply sa kuryenti sa isla.
Dako kini og reserba sanglit ang demand sa supply sa kuryenti sa isla anaa lamang sa 1,200 kilo watts.
Matod ni Chan nga pinaagi unya niini dili na mabalaka ang mga taga isla sa kanunay nga masinating brownout matag adlaw nga dugay na nilang giantos.
Dako usab ning kaayohan alang sa mga patigayon og resort sa isla sanglit 24/7 na nga dili mabalda ang ilang serbisyo sa mga taga isla ug dumuduong.
Karong panahon sa pandemiya daghan ang mga patigayon ug resort sa isla nga apektado sa kanunay nga masinating brownout sanglit moreklamo ang ilang mga kustomer ug guest sa kahasol.
Ang isla sa Olango maoy sagad suroyan sa mga turista panahon sa weekend ning panahon sa new normal gumikan sa nindot nga baybayon ug talan-awon.
Mas makaagni usab unya kini sa ubang investors nga mo-invest sa isla sumala sa mayor sanglit dili naman problema ang kuryenti sa lugar.
Ang konseho sa dakbayan una nang mihangyo sa Energy Regulatory Board (ERB) pinaagi sa pagpasar og resolusyon nga mo-interbener unta ang ahensya sa suliran sa kuryente sa isla nga nakaapekto sa mga patigayon ug resort niing paahon sa pandemya.
“Kini karon nagbunga na ang atong sige pangulit sige pag follow up ania na mao karong adlawa, Pebrero 25, mao adlaw sa kagawasan diin kita gikan sa kangitngit makabaton na ta ug 24 oras nga kahayag,” matod ni Chan sa Superbalita Cebu. (GCM)