Dugang mga hotel sa Dakbayan sa Sugbo gamiton isip isolation center alang sa mga pasyente sa coronavirus disease 2019 (Covid-19).
Ning semanaha, laing 100 ka beds sa mga hotel ang madugang samtang daghan pa kaayong mga bakanteng katre sa isolation centers sa kagamhanan.
Ang Cebu City Emergency Operations Center (EOC) nakigtambayayong tali sa Department of Health (DOH) 7 ug Department of Tourism (DOT) 7 alang sa paggamit og dugang hotels
sa siyudad isip isolation facility.
Si DOH 7 spokesperson Mary Jean Loreche niingon nga dugang lima ka hotel ang ma-accredited sa pagdawat og mga pasyente. Matod ni Loreche nga ang mga pasyente nga dunay mild symptoms mahimong moadto sa isolation hotels.
Ang chief implementer sa Inter-Agency Task Force (IATF) for the Visayas Melquiades Feliciano, sa usa ka forum nga giorganisar sa Cebu Citizens Initiative sa Pebrero 25, 2021, niingon nga dugang 100 ka beds sa isolation hotels karon madugang sa tapos sa semana aron makapasulod og dugang mga pasyente sa Covid-19.
Si Cebu City Councilor Joel Garganera, EOC deputy chief implementer, niingon nga lima ka isolations hotels ang gigamit karon.
Sa data sa EOC sa Pebrero 25, 51 ka beds ang magamit pa kun bakante sa lima ka hotels.
Ang isolation hotels naglakip sa Sampaguita Suites duol sa Basilica Minore del Santo Niño nga dunay 48 ka lawak, unom niini bakante pa; Travel Bee sa Capitol Site nga dunay 27 ka lawak, apan upat na lang ang bakante; Hotel Pier Cuatro nga nagtanyag og 70 ka rooms, duna pay 14 nga bakante; Sampaguita Suite sa Fuente Osmeña nga nagtanyag og 32 ka rooms nga dunay 27 nga bakante; ug Travel Bee sa Fuente Osmeña nga nagtanyag og 26 ka rooms nga tanan okupado pa. / JJL
Dunay 173 ka mga pasyente sa Covid ang gi-isolate sa mao nga mga hotel sa Pebrero 25.
Matod ni Garganera nga sunod semana, 50 ka mga lawak madugang kay mobukas ang Cebu Grand Hotel
Ang dugang hotels magpalikay nga di maghuot ang mga ospital human mabantayi sa EOC nga 30 ngadto sa 50 porsyento sa mga nag-ukopar sa mga hotel mild ug asymptomatic nga mga pasyente.
“Modako-dako na atong capacity. Instead of modirecho sila, katong mild ra kaayo og gipangbati, they’d rather go to (sa) mga hotels na lang,” matod ni Garganera sa miaging interview.
Bisan naa sa hotels, ang pasyente i-monitor gihapon sa City Health Department ug DOH.
Base sa date sa EOC sa Pebrero 24, ang mga 245 ka katre sa New Normal Oasis for Adaptation and a Home (NOAH) okupado apan dunay 205 nga bakante; 108 ang gigamit na sa sa IC3 Bayanihan Center apan duna pay 22 nga magamit; 130 ang okupado sa Cebu City Quarantine Center (CCQC) ug dunay 30 ka katre nga bakante; samtang 849 ang bakante sa barangay isolation centers (BICs), 427 ang okupado na.(JJL)