UPAT ka tuig nang wa makita ni Lita Moral ang iyang anak nga babaye, busa nagtuo siyang patay na kini.
Apan nakugang siya dihang iyang nasayran nga ang iyang anak nia sa Sugbo ug usa sa mga “na-rescue” sa kapulisan gikan sa usa ka retreat house sa University of San Carlos sa Barangay Talamban, Dakbayan Sugbo.
Matod ni Moral nga naghandom na lang siya sa iyang anak kay nagtuo siyang patay na kay sukad kini gidala, wa na silay komunikasyon. Naghilak si Moral nga nag-asoy sa iyang kasinatian pinaagi sa usa ka interpreter sulod sa buhatan sa Regional Intelligence Division (RID) Central Visayas sa Camp Sergio Osmeña.
Si Moral usa sa lima ka mga ginikanang Manobo nga gikan sa Lalawigan sa Sultan Kudarat sa Mindanao nga nangabot sa Huwebes sa alas 4 sa hapon luwan sa usa ka barko.
Giubanan sila sa usa ka social worker ug giabagan sa Cebu City Social Welfare Services aron makuha ang unom ka mga menor nga nagpabilin sa Dakbayan sa Sugbo.
Ang ikaunom nga menor kuhaon pinaagi sa abag sa usa ka social worker aron ang unom ka mga menor madala og balik sa ilang dapit.
Sila niasoy kang Police Colonel Roberto Lingbawan, hepe sa RID-Central Visayas, nga wa sila masayod nga ang ilang mga anak gidala sa Sugbo sa Salugpongan. (BBT)