OPISYAL nga gideklara sa Malacañang ang Lunes, Marso 1, 2021, isip special non-working holiday sa Siyudad sa Davao aron isaulog ang ika-84th Araw ng Dabaw.
Si Executive Secretary Salvador C. Medialdea, kinsa maoy mipirma sa Proclamation No. 1106 niadtong Pebrero 24 sa ngalan ni Presidente Rodrigo R. Duterte, nagsulti, "It is fitting and proper that the people of the City of Davao be given full opportunity to celebrate and participate in the occasion with appropriate ceremonies, subject to community quarantine, social distancing, and other public health measures."
Una giaprobahan, ang 19th City Council miduso og resolusyon nga naghangyo kang Duterte nga ideklara pinaagi sa Presidential Proclamation ang Marso 1 isip usa ka special non-working holiday sa siyudad aron isaulog ang tinuig nga Araw ng Dabaw.
Tungod sa Covid-19 pandemic nga nagdili sa panagtapok, si Davao City Mayor Sara Duterte-Carpio nagsulti nga ang pagsaulog sa Araw ng Dabaw halos tanan himuon pinaagi sa online karong tuiga.
“Mag-celebrate gihapon ta. Duna na ta’y plan (Our plan is) all our activities will be online," pagtin-aw ni Duterte-Carpio niadtong Lunes, Pebrero 22 sa 87.5 FM Davao City Disaster Radio. (Ralph Lawrence G. Llemit)