GIDUSO ni Brooklyn Nets superstar Kyrie Irving nga usbon ang ilisdan ang logo sa National Basketball Association (NBA) sa hulagway ni 5-time NBA champion Kobe Bryant.
Gi-post ni Irving sa iyang Instagram account ang desinyo sa bag-ong NBA nga adunay action photo ni anhing Bryant ug kasamtangan kining nag-viral sa social media.
Matod pa sa caption ni Irving nga kinahanglanng mahibato ang pag-ilis sa logo. Ang tumong pud ni Irving mao ang paghatag og gibug-aton sa kontribusyon sa black basketball players sa NBA.
“Gotta Happen, idc (I don’t care) what anyone says. BLACK KINGS BUILT THE LEAGUE,” suwat ni Irving sa iyang caption nga aduna nay 1.2 million likes ug 27,000 comments.
Mismo ang asawa ni Bryant mi-react sa maong sugyot ni Irving ug gibutang sa iyang IG story ang maong logo.
Ang logo sa NBA karon mao ang 1-time NBA champion ug superstar niadtong dekada 60 ug 70 nga si Jerry West.
Sama kang Bryant, si West miduwa lang sa usa ka team – ang Los Angeles Lakers – niadtong 1960 hangtod 1974.
Matod pa ni West sa iyang interview niadtong 2017 nga kon usbon man gani sa NBA ang maong logo uyon ra pud siya niini.
Managlahi ang opinyon sa netizens sa post ni Irving. Adunay miingon nga pabor sila sa pag-ilis sa logo ngadto apan di lang unta labuton ang race issue kabahin.
Anaa puy misugyot nga panahon na gyud nga ilisan sa NBA ang maong logo kay dugay na kini.
Si Bryant namatay niadtong Enero 26, 2020 sa usa ka makalisang nga helicopter crash diin patay ang tanang siyam ka mga tawo nga sakay sa maong helicopter lakip na ang 13-anyos nga babaye nga anak ni Bryant nga si Gianna.
Si Bryant gikonsiderar nga usa sa greatest scorers of all time diin usa sa highlight sa iyang career mao kadtong mi-iskor siya 81 puntos sa usa ka duwa batok sa Toronto Raptors niadtong 2006.
Sa iyang 20-year NBA career sa Lakers midaog siyag 5 ka NBA titles, 2 NBA Finals MVP, 1 Season MVP, 4 ka NBA All-Star MVP, 2 ka NBA Scoring Title, NBA Slamdunk Champion, ug uban pa.
Tungod sa grabe niyang nabuhat giretiro sa Lakers ang duha niya ka mga jersey nga No. 8 ug 24. (RSC)