HUMAN gideklarar ni Gobernador Gwendolyn ‘Gwen’ Garcia nga ang iyang administrasyon dinhi sa lalawigan sa Sugbo dakong supak sa lain na sab nga hugonhugon nga lockdown, niduyog ang mga mayor dinhi sa Metro Cebu.
Ang ilang pagsupak nakahatag nato og igong kadasig ug kusog nga pinaagi sa panaghiusa sa atong mga lider makasugakod kita ning gubat batok sa pandemya.
Sa ato pa, ang atong pagsige og sanong sa kagustohan sa mga tigpatuman sa mga health protocol, supakon pabor sa usa ka kawsa pagpalig-on pagbalik sa atong ekonomiya. Kinsa bay gustong mobalik niadtong mga panahon nga atong kagawasan paghukom kong asa kita gustong magpakabuhi gilimitahan nianang mga checkpoint nga nakapaalaot ilabi natong mga kabus.
Grabing gutom ang nasinati sa mga lockdown nga gipatuman. Pun-an pa sa mga pagpahimulos sa pipila. Klaro man kaayo nga gisakyan sa mga mapahimuslanon ang mga lockdown nga gipamugos pagpatuman. Kuhai og basi kadtong nabaniog nga isyu sa benignit sa Carbon Market nga gipasanginlan nga hinungdan sa tinakdanay.
Kinsa man ninyo ang nakaapil og pamalit og mga sangkap sa pagluto og benignit samniaging semana santa? Kasimpld nga matang sa binisaya nga pagluto og masima sima panahon sa semana santa. Pero kon basihan nimo ang taga liog nga presyo sa saging kardaba nga niburot ngadto sa tag P125 ang kilo gikan sa tag P25, ang brown sugar nga taga P30 nisaka ngadto sa P50, samot na ang landang.
Grabiha sa pagsaka sa presyo niadtong higayona. Ang gipasanginlan mao ang pandemya. Niingon sila nga ang pinalitay sa mga sagol sa benignit nga gipunsisokan sa mga tawo sa dalan Calderon sa Carbon Market maoy hinungdan sa tinakdanay sa makamatay nga coronavirus. Dili kaha tinakdanay sa makalilisang nga pagsulbong sa presyo sa palaliton?
Kay human sa benignit, halos tanang presyo sa palaliton nisaka. Tiaw nimo na, ang mga gym sa barangay nga gihimo na nga merrkado, mga utanon hilabihang mahala. Ang alugbati gipamaligya og tag P120 ang kilo, samot na ang kamunggay ug ubang sagul da utan. Ang lamas wa sab magpauwahi. Makaguol hunahunaon sa mga pumapalit. Makalipay alang sa mga mapahimuslanon. Kinsa man ning mga tawhana nga nasapian tungod sa grabing pagpahimulos dili gihapon nimo madala ang imong ginansiya sa laing kalibutan. Kining tanan nanghitabo tungod sa lockdown.
Gihagit kita nga kong gusto ta nga mabalik sa makamatay nga sitwasyon hala atong kalawaton kanang giingon nilang pagpabalik sa lockdown.
Timan-i ang virus dakong buhi ug angay nga likayan pinaagi sa pagtuman sa mga health protocol sama sa pagsul-ob og face mask, pagpanghunaw ug social distancing. Pero ang labaw nga makamatay mao kanang virus sa kahangul ug pagpahimulos sa uban panahon sa lockdown.