Sa kalisod sa panahon karon gisamutan pa sa sunodsunod nga katalagman og higanting trahedya nga dala sa Covid-19, ubay-ubay nato ang nawad-an sa panginabuhian ug mga minahal nga nakalas. Bisan pa man sa nahiaguman, padayon kitang nanlimbasog pagpakabuhi aron makalahutay og makalabang sa kalisod.
Ang akong ipaambit karong adlawa mao ang mga paagi aron di kita tantong mabug-atan sa mga inad-adlaw nga gastuhan.
Angay balikan og tan-awon kung gi-unsa nato pag-gasto ang atong kinitaan aron masuta kung asa makadaginot og unsay angay buhaton.
Dugang sugyot, hinayhinayan ang pagkaon sa gawas. Ang luto sa balay ni nanay mas presko, lamian og masustansiya. Kung mangaon sa gawas,
gawas nga doble ang gasto plus tip, delikado pa gayod nga matakdan sa Covid-19.
Tingba pagpalit inig mangumpra. Mas makatabang kung ilista daan ang palitunon basi sa gihan-ay nga menu sa lutounon anang semanaha. Lainlaina imong sud-an aron ang imong kabanay di mapul-an unya seguraduha nga mas daghan ang utanon kaysa kan-on ug karne.
Mas maka ipon sab ka kung ari mangumpra sa mga pampublikong mercado (Taboan o Carbon) kay dako kini og deprensiya sa presyo ikumpara kung adto ka sa mall mamalit. Gawas nga daghan ka og kapilian, makahangyo kapa sa mga palaliton unya makatabang sab sa mga gagmay nga manindahay.
Pagkat-on pagpuyo og pinubre. Hinumdumi ayaw paggasto nga labaw pa sa imong kinitaan. Pangita og pa ag inga makabarato ka unya itadi ang presyo imbis Ganador ang bugas imong naandan nga tag P55/K ari na lang ka sa Sinandoming nga tag P42 ra ang kilo.
Mas maayong magbalon kung manrabaho kaysa mamalit og luto daan. Pagdala sab og sudlanan sa tubig (tumbler) aron di na magpalit anang binotilyang tubig nga tag P15.00.
Makaipon sab ka og magsakay og jeepney kaysa pribadong sakyanan kay ang gasoline padayong nagsaka.
Katapusan, disiplinaha ang kaugalingon pagtabig og 10-20% sa kinitanan kada buwan aron dunay mahipos og di na magkabikos-bikos.