DUHA ka mga babaye ang naluwas sa kapulisan gikan sa usa ka bugaw nga nagbaligya kanila ngadto sa mga kustomer sa binayran nga lawasnong kalipay.
Nahitabo ang pagluwas sa duha ka mga babaye sulod sa lodging house sa Sityo Sangi, Barangay Tabunok sa Talisay City kagahapon, Pebrero 26.
Ang duha ka mga babaye, 29 ug 33 anyos, ang anaa na karon sa pag-atiman sa social worker services sa Talisay.
Matod ni Police Lieutenant Colonel Gerard Ace Pelare, hepe sa Talisay Clty Police Station, ang rescue operation kini may labot na sa sumbong sa pipila ka mga nagpakabana nga indibiduwal.
Gipangulohan sa Womens Children and Protection Desk (WCPD) sa Talisay police ug uban pa nga mga ahensiya, ang pagluwas sa duha ka mga babaye nilampos.
Giposasan usab ang gitudlo nga bugaw kinsa giila ni Pelare nga si Connie Talia, 38, ug molopyo sa Sityo Mananga sa Barangay Tabunok, Talisay.Si Talia mag-atubang og kaso nga kalapasan sa Republic Act 9208 o Human Trafficking Act. (BBT)