GIKASAGMUYO ni Lapu-Lapu City Mayor Junard Chan ang kalangay sa pagtubag sa kadagkoan sa Mactan Cebu International Airport Authority (MCIAA) sa iyang hangyo nga ibalik ang help desk sa tugpahanan.
Si Chan nipadala na ug suwat sa MCIAA duha ka semana na ang nakalabay kalabot sa iyang hangyo apan hangtod karon wa pa siya tubaga kalabot niini.
Matod sa mayor nga gipasaligan siya sa MCIAA nga tukion ang iyang hangyo sa board meeting sa Marso 5 apan, alang kang Chan, taas naa kaayo kini nga panahon sukad giwala ang help desk.
Sa pagkakaron, dili makamonitor ang kagamhanan sa mosulod nga mga pasahero sa dakbayan kung wala ang help desk sumala ni Chan.
Gipasabot ni Chan nga kun ugaling ang ubang local government unit (LGU) uyon ra nga wala silay help desk apan ang kagamhanan sa Dakbayan sa Lapu-Lapu mangayo niini sanglit usa kini ka paagi alang kanila nga ma monitor ang mga pasahero nga moabot sa dakbayan.
“Ingon ang MCIAA nakita man nako sa balita nga kung mangayo mi mangayo sad ang ubang LGU. Pwede raman siguro usa lang ka help desk ibutang. Unya kanang help desk ibutang diha mao na nay mokuha sa tanang mangabot. Pwede raman magsabot ang tri-cities, magsabot ang Province of Cebu nga kutob sa moabot anaa gyuy dokumento,” pasabot ni Chan.
Subay sa plano sa Department of the Interior and Local Government (DILG) nga himuong sayon alang sa mga turista ang pagbiyahe hinungdan nga plano nilang wagtangon ang mandatory swab test. Si Chan mibutyag nga wala siyay supak niini apan kinahangaln nga ibalik ang help desk sa tugpahanan.
Sanglit mao ra kini ang paagi nga ma-monitor ang mga pasahero nga mosulod sa iyang dakbayan.
Gihimug-atan ni Chan nga makadaghan na nga higayon nga peke ang dokumento nga gidala sa mga pasahero nga mosulod sa dakbayan apan ilang nasakpan pinaagi sa help desk.
“Ok lang moingon ta medcert for tourist. How about dili tourist? Unsaon nato pag- control? Mao nay dakong pangutana unsaon nato pagkahibawo nga naa siyay medcert ang non-tourist. Atong nadunggan diri nga inig gawas nila hayon na lang kaayo pagawas, wa natay kalibutan unsay sitwasyon ato niya kay di na ta ka monitor,” matod ni Chan. (GCM)