IHAP sa nangamatay ug naangol gilista sa bulletin board gibutang sa kilid sa karsada sa Barangay Gaas, Lungsod sa Balamban human sa sunodsunod nga disgrasya sa mga motorsiklo sa Cebu Transcentral Highway nga miabot na sa 32 ka kinabuhi ang nakalas sulod lang sa duha ka tuig.
Matod ni Gaas Brgy. Kapitan William Genil, kasagaran sa mga nadisgrasya mao kadtong kusog nga nakapadagan sa ilang mga motorsiklo.
Ning bag-o lang, nakalas mao ang anak sa kanhi kapitan sa Gaas nga usa ka babaye human madisgrasya samtang nagsakay sa iyang motorsiklo.
Samtang, sa kapin sa 100 nga disgrasya, 70 niini mga hubog ug giingong nakainom sa ilimnong makahubog nga wala nay kahadlok nga mopadagan sa motor.
“Actually, dili man ko motuo anang hilan. Dili gyud, kung magmaneho ka nga hinayhinay lang careful lang gyud ka mag maneho wala gyuy mahitabo nimo. Pero 70 percent sa accident under influence of liquor man, mga hubog,” matod ni Genil.
Tungod niini, usa ka pribadong indibidwal nga usa ka mahigugmaon sa motorsiklo nga nakasinati na usab og disgrasya sa karsada ang nakahunahuna nga mag butang og death toll board aron masayran sa mga mangagi nga nakamotor nga mag-amping.
Si Cyril Velasco, tag-iya sa Garnett Driving School, nagkanayon nga nahimo na niya kining adbokasiya ang pagpahimangno nga magmatngon aron dili na masubli ang nahitabo kaniya diin hapit siya mabugtoi sa iyang kinabuhi.
Matod ni Velasco nga pinaagi niini masayod ang mga motorista nga ang maong dapit accident prone area diin daghan na sa kinabuhi ang namatay ug angayan nga mag-amping.
Gikalipay usab kini sa Highway Patrol Group (MPG) 7 nga adunay nagpakabana nga Sugboanon nga migasto sa iyang kaugalingong kuwarta aron butangan og karatula alang sa mga motorista nga mag-amping sa pagmaneho.
Matod ni Police Major Mike Gingoyon, provincial chief sa HPG, ang disgrasya sa kadalanan sa sa nag-una nga krimen sa nasud nga angayang hatagan og pagtagad sa tanang ahensya. (AYB, GPL, BBT)