SUGOD karong alas 11:59 sa gabii, sa Sabado, Enero 27, 2021 gilibkas na ni Mayor Junar 'Ahong' Chan ang liquor ban nga iyang gipatuman sa miaging semana taliwa sa pagsaka sa mga coronavirus disease (Covid-19).
Lakip sa iyang gilibkas nga nalatid sa iyang Executive Order (EO) 2021-010 mao ang ban sa sabong, operasyon sa internet cafes ug videoke/karaoke.
Apan magpadayon ang number coding sa pagpamalit sa kamerkaduhan, apil na ang malls, department stores ug convenience stores.
Matod ni Chan nga iya kining nahukman human maka recover ang 129 ka mga pasyente sa Covid-19 gikan sa isolation facility.
Apan sa gihapon naa ang curfew gipatuman.
"Anaa ra gihapon ang atong curfew gikan alas 10 sa gabii hangtod alas 5 sa buntag, paggamit sa quarantine pass, ug number coding scheme," pahibawo ni Chan.
Iyang giawhag ang mga Oponganon sa padayong pag-obserbar sa mga health protocol sama sa pagsul ob kanunay sa facemask, face shield, social distancing, paghugas sa mga kamot.
" Pinaagi sa atong pagtinabangay ug panaghiusa makab-ot nato ang kadaugan batok niining makalilisang nga sakit. Nanghinaot ko sa inyong kooperasyon kay mao kini ang yawi sa atong kalampusan," dugang ni Chan. (REV)