ANAA na sa 3,781 ang kinatibuk-ang ihap sa mga kumpirmadong kaso sa coronavirus disease-2019 (Covid-19) sa Cagayan de Oro human nagpositibo sa Sars-CoV-2 ang 15 ka mga residente sa dakbayan.
Matud ni Acting City Health Officer Dr. Lorraine Nery, sa 15 ka mga bag-ong mga kaso, duha ang mga close contacts sa mga pasyenteng nagpositibo sa coronavirus, pito ang mga lokal nga authorized persons outside of residence (Apors), ug unom ang mga local index nga mga kaso.
Sa 3,781 nga kinatibuk-ang kaso sa Covid-19 sa syudad, 422 ang mga returning overseas Filipino workers/locally stranded individuals (ROFs/LSIs) ug 3,359 ang mga local transmissions.
Matud ni Nery, sa 3,359 nga mga local nga kaso, 186 ang mga persons deprived of liberty (PDLs), 1,772 ang mga local index cases, ug 1,399 ang mga local cases with link.
Aduna nay 188 ka mga aktibong kaso ang Cagayan de Oro diin 45 niini na-admit sa Northern Mindanao Medical Center ug uban pang mga ospital sa syudad ug 143 ang mga outpatients.
Gawas niini, aduna sab natala nga 50 ka mga pasyente nga naka-rekober na.
Sa karon, anaa na sa 3,412 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 2,991 ang mga lokal nga kaso (community: 2,545; Apors: 446).
Niabot sa 181 ang ihap sa mga namatay sa Covid-19 sa syudad.