Sa usa lang ka pamilok, nikalit og ka awop ang damgo sa seven-footer nga si Kai Sotto nga mamahimong unang homegrown talent ug full-blooded Filipino nga makaduwa sa National Basketball Association (NBA).
Kini human nga wala na siya dawata og balik sa iyang mother team Ignite sa G League. Mibiya man gud ni si Sotto sa bubble didto sa Orlando aron unta moduwa sa Gilas Pilipinas alang sa 2021 Fiba Asia qualifiers nga adto unta duwaon sa Qatar, apan sa wala damha nakanselar ang maong tournament tungod sa pagsaka sa Covid-19 infections.
Daghan ang nagtuo nga hatagan og prayoridad ni Sotto ang Ignite team kay mao man kini ang pinakaduol nga agianan aron makab-ot ang iyang damgo nga makaduwa sa NBA.
Tiaw mo bay iyang gibalibaran ang mga tanyag sa mga dagkong eskuwelahan sa NCAA kay lagi gipalabi niya nga moderitso na lang sa G League.
Septiyembre 1, 2020, si Sotto ug ang kinatibuk-ang puwersa sa Ignite team nagsugod na og training didto sa California diin iyang gikauban ang Filipino-American nga si Jalen Green, Jonathan Kuminga, Isaiah Todd, Diashen Nix ug ang Indian Center nga si Princepal Singh.
Gituohan sa kadaghanan nga nagsubay sa saktong rota ang 7-3 nga Sotto. Tukma ang desisyon.
Milanat og pipila ka buwan ang iyang grabing ensayo ug milig-on na gyud unta ang ilang relasyon sa team.
Apan sa unsang pagka unsaa, nakurat na lang ang kinatibuk-ang puwersa sa Ignite sa dihang niadtong Enero hugot nga gianunsyo ni Sotto nga moduwa siya sa Gilas Pilipinas bisan pa man og nadungan usab kini sa pagsugod sa G League.
Iyang gipalabi ang Gilas Pilipinas kay sa Ignite team nga maoy nag-invest ug nagsuweldo kaniya. Si coach Brian Shaw wala mahimuot niini ug gani misuway kini pagkombinsi ug pagpasabot ni Sotto, apan way nahimo kay porsigido man gyud sila sa ilang desisyon.
Karon nga wa madayon ang Fiba Asia qualifiers, gusto na sa Team Sotto nga mobalik sa US aron moduwa na sa Ignite?
Si bisan kinsa na man siguro ang anaa sa sitwasyon sa Ignite dili gyud ta kabasol kon unsay ilang makab-ot nga hukom.
Aduna silay dungog nga giprotektahan ug labaw sa tanan gawas sa gitas-on wala pa usab silay laing nakita ni Sotto nga makaagni kanila sa pagpaubos sa ilang garbo aron kini dawaton og balik. After all, wa sila magnihit og players.
Sa gikaingon ko na sa niagi natong lindog nga mora og nisimang ang rota ni Sotto ug wala mosubay sa ilang orihinal nga plano.
Dunay dakong sipyat ang handler nga hangtod karon padayon pang nagpakahilum kalabot sa maong hitabo.
Yes, at 18, bata pa si Sotto ug hataas pa kaayo ang panahon alang sa katumanan sa iyang damgo.
But it was a “so near and yet so far” situation for the Filipino NBA prospect. Diha na gyud unta siya sa ganghaan apan iya kining natalikdan.
Ang bugtong nilang mahimo karon mao na lang pagdawat sa hitabo ug kamatuoran apan dili wagtangon ang kadasig ug paglaom nga sa umaabot nga mga adlaw makab-ot na gyud ang kalampusan. (jun.migallen22@gmail.com)