SUPERBALITA CEBU

Mongaya: Parehong di sila moangkon

Panahom

MAKAPAHIMUOT ang mga pamahayag sa lain-laing mga presidentiable. Pareho silang di moangkon nga modagan pagka presidente samtang ang ilang mga tigsuporta nag-awhag kanila nga modagan.

Kagahapon, gipahigayon ang usa ka SaraVan ug nikuyanap ang mga streamer nga “Run, Sara, Run.”

Gianunsyo na sab ang mga lider sa Manny Pacquiao for President Movement (MPPM) nga mga Sugboanon. Sila si Noreen Tormis ug Tonton Antogop.

Sa miaging duha ka semana, nag-press conference ug naay online petition ang mga tigsuporta ni Bise Presidente Leni Robredo. Gi-imbitar sab ko sa usa ka Zoom forum uban sa mga USC alumni ug ang speaker kay si Erin Tañada sa Liberal Party.

Pareho silang Bise Presidente Leni Robredo, Mayor Inday Sara Duterte-Carpio, ug Sen. Manny Pacquiao nga di moangkon nga sila modagan. Apan ang ilang mga tigsuporta naglihok na nga daw nangampanya.

Ato lang nabantayan nga daw dunay bentaha ang kampo ni Inday Sara kay atong masabot nga nagpaluyo si Gob. Gwen Garcia kaniya.

Apan kadtong kalihokan kagahapon iya sa mga volunteer. Hinuon, identified sila sa duha ka mga opisyal sa administrasyon nga suod sa grupo sa Siyudad sa Davao ug ni Mayor Sara.

Ako kining giklaro kay naila baya si Sara nga dunay iyang mga tawo nga lahi sa mga gurs nga naa sa Cabinet ni Presidente Duterte. Nailhan kini si Inday Sara nga magdala og iyang mga tawo. Lahi ang team niya kon itandi sa mga suod ni Sen. Bong Go.

Pamahayag sab sa mga lider ni Leni nga di pa gyud kumbinsido si Bise Presidente nga modagan tungod sa iyang resulta sa survey diin siya mga number 5 lang. Consistent nga number 1 si Inday Sara. Alternatibo kuno ni Leni mao ang pagdagan og gobernadora.

Ang ato lang nabal-an nga sa miaging 2016, gikan kana siya sa labing ubos sa survey ratings hangtod nga nagkasaka. Pag-abot sa eleksyon, aw napildi gyud ang frontrunner nga si Bongbong Marcos.

Sa iyang bahin, nakahibawo na kita nga nagsigi karon og pangrekrut diha grassroots ang grupo sa MPPM kun ang Manny Pacquiao for President Movement (MPPM). Sa miaging lindog, nakahisgot kita nga nagplano unta si Senador moanhi sa Sugbo aron manghatag og mga hinabang.

Apan giingong nasuko kuno si Gob. Gwen ug Mayor Sara dihang nakahibawo sila sa maong plano. Mao nga wa hinuon madayon.



BAKUNA



Bisan pa man sa sentimento sa mga health worker dinhi sa Sugbo nga mas gusto sila og mas epektibo nga bakuna sama sa hinimo sa Pfizer ug Moderna, naabot man ang gikan sa China nga Sinovac.

Gani, dunay mando karon nga magsugod ang pagpamakuna og health workers karong Marso 3, 2021 diha sa Vicente Sotto Memorial Medical Center (VSMMC). DM @anol_cebu

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph