HUMAN sa debate kon unsa nga matang sa bakuna ang atong paliton ug ang pagpaabot niini, sa katapusan moabot na gyud ang unang hugna sa bakuna karong adlawa. Sinovac nga hinimo sa China ang unang moabot. Hinuon, dili pa dayon makasugod sa pagpatusok kay i-review pa gyud og maayo sa atong mga health official ug mga eskperto. Basin sunod semana na ang pagtusok ug ang frontliners maoy unahon.
Ang problema karon sa kagamhanan kon unsa-on sa pagkombensi sa katawhan nga magpabakuna gumikan niining nanggawas nga mga taho batok sa bakuna. Dili diay garantiya ang bakuna nga sa panahon nga mabakunahan na ang usa ka tawo, dili na kini matakbuyan. Dinhi sa ato, adunay duha ka overseas Filipino workers (OFW) gikan sa United Arab Emirates (UEA) ug Canada nga natusukan na didto apan nag-positibo gihapon dinhi. Daghan na hinoon ang nagduha-duha.
Usa ka magsusulat mihulagway niining pagpanagana sa katawhan sa pagpabakuna batok sa Covid 19 nga mao ang mas dako pang pandemya nga giatubang karon sa tanang kanasuran. Kining pagpanagana o hesitancy sa Eninglis pa, normal lang nga proseso nga maagian sa katawhan. Malantaw kini nga positibo kay nagpasabot kini nga ayuhon gyud pagtuon ang tanan una modesisyon.
O malantaw usab kini nga negatibo kay nagpakita kini sa kakuwang sa hustong pagsabot ug mao nga magdugay-dugay sa pagdesisyon. Samtang tinuod, maayo gyud nga hinuktukan pag-ayo ug paladman pa ang pagtimbang-timbang kon magpabakuna ba o dili. Atong hinumduman nga wala na kitay luxury of time o wala nay igong panahon sa paghuna-huna. Atong ipakasama nga nag-atubang kitag dakong mangtas ug nihana na sa pagtukob kanato. Kanang mangtas nga gitawag og Covid-19. Aduna pa ba kitay panahon sa paghinoktok o angay na kitang maglumpayat sa pagsambunot ning maong kaaway nga diin bakuna lamang ang bugtong natong hinagiban? Karon na. Now na! Ginamit nato ang bisan unsa natong makuptan nga atong ibuno sa Covid uban ang paglaum nga mao ra gyud ang makapalayo kanato gikan sa tumang disgrasya. Anaa ra ninyo ang paghukom kon magpabakuna ba mo o dili. (bobbygnalzaro@gmail.com)