DAGHAN na sa mga local government unit ang gusto nga lugakan ang travel restrictions aron mahibalik na ang mga biyahe ngadto sa “new normal.” Gihukman sa Inter-Agency Task Force (IATF) nga lugakan ang mga rekisito pinaagi sa di na pag-require og swab test ug quarantine sa mga namiyahe. Apan naa lang gihapon ang estriktong pag-obserbar sa mga health protocol.
Sakto kaayo si Gobernador Gwendolyn Garcia nga panahon na nga ang Sugbo mo-move on aron mabuhi na ang ekonomiya, labina ang turismo, nga grabeng pagkapiang sa mga quarantine sa miaging tuig. Tinuod usab ang iyang gisulti nga sa quarantine, ang mga kabos maoy mag-antos.
Kay kinsa man ang mga tawo nga naa sa industriya sa turismo? Kasagaran mga mananagat ug mag-uuma ingon man yanong mga trabahante nga naa sa mga hotel ug resort nanginabuhi. Sila dunay gipangbuhi nga mga pamilya. Unya ang ayuda sa kagamhanan kuwang ra kaayo sa ilang mga panginahanglan.
Magsugod na man og pangabot ang mga bakuna nga gipamalit sa nasudnong kagamhanan. Gihan-ay na gani ang mga pamaagi sa pagbakuna ubos sa pagtambayayong sa mga local government unit (LGU). Ang mga LGU usab naggahin og pundo aron pagpalit og kaugalingong bakuna kon magkuwang ang ihatag sa Malacañang.
Andam na usab ang mga LGU sa pagtubag sa pagsaka sa mga kaso sa coronavirus disease (Covid-19). Sa Siyudad sa Sugbo lang, gidugangan ang hotel beds aron mas maka-accommodate og dugang mga pasyente nga asymptomatic ug mild. Ang barangay isolation centers (BIC) naghinobra ang beds nga giandam.
Kay sagad sa nangamatay mga senior citizen man, gidili gihapon ang pagpabiyahe sa mga 65 anyos pataas. Makita nga tuod misaka ang mga kaso sa pagpanakod, apan ang gidaghanon sa nangamatay di sama sa miaging tuig.
Naa na man gyud ning mao nga mga lakang nga gihimo sa kagamhanan, panahon na gyud nga mag-move on ang mga Sugboanon.