Amnestiya sa Mandaue alang sa na-impound nga sakyanan

MOHATAG na unya og amnestiya ang dakbayan sa Mandaue alang sa mga na-impound na nga mga sakyanan nga nahiluna sa Traffic Enforcement Agency of Mandaue (Team) impounding area.

Kini human giaprubahan sa una nga pagbasa ang ordinansahon alang niini niadtong Peb. 24, 2021 sa ika-83 nga regular nga sesyon.

Si Mandaue City Councilor Jimmy Lumapas, chairman sa Committee on Transportation, niingon nga nahimo ang maong ordinansahon human niya nakita nga puno na ang impounding area sa Team.

Kini tungod sa agresibo nga pagpanakop sa Team sa mga dili balido nga prankisa ug way rehistro nga sakyanan.

Atol sa meeting sa Mandaue City Traffic Board niadtong Pebrero 18, 2021, gisabutan nga hatagan og amnestiya ang mga sakyanan nga na-impound sa lima ka tuig.

Nadesisyonan usab kini aron mas mapaspasan nga mahawan ang impounding area ug makolekta na sa Team ang bayad sa storage fee sa mga sakyanan nga napundo na og pila ka tuig.

Sa maong ordinansahon, hatagan og 30 ka adlaw nga amnestiya ang mga tag-iya nga ipahibawo unya sa Team ang skedyul niini.

Hatagan ang mga tag-iya og diskwento sa ilang storage fee apan wala kini labot sa bayranan nila sa violation, towing fee, surcharge ug uban pa nga bayranan.

Ang storage fee nga ipahamtang sa matag sakyanan nga dili makuha kay P500 matag adlaw sukad sa pagka-impound niini.

Ang mga sakyanan nga na-impound gikan Enero 2015 hangtod Disyembre 2017, hatagan og 30 porsiyento nga diskwento.

Kadtong na-impound gikan Enero 2018 hangtod Disyembre 2019, hatagan og 20 porsiyento nga diskwento.

Samtang ang mga sakyanan nga na-impound gikan Enero 2020 hangtod Disyembre 2020, hatagan og 50 porsiyento nga diskwento.

Gihatagan og 50 porsiyento nga diskwento ang na-impound sa 2020 tungod kay naigo ang nasod sa pandemiya ug nakasabot sila nga nahunong ang kalihokan sa ekonomiya ug maglisod pa sila og bayad.

Kinahanglan nga full ang pagbayad ngadto sa City Treasurer’s Office, sa dili pa iuli sa Team ang sakyanan.

Si Edwin Jumao-as, pangu sa Team, niingon sa Superbalita Cebu nga adunay lainlaing mga sakyanan ang na-impound sa ilang opisina sama sa mga motorsiklo, traysikol, trak, multicab, ug wingvan.

Human sa 30 ka adlaw nga amnestiya, ang mga sakyanan nga dili pa ma-claim ipaubos na kini sa public auction.

Si Jumao-as namahayag nga mas barato na ang baligya sa mga sakyanan tungod gikonsidera na kini nga scrap.

Gisaysay sab sa ordinansahon nga ang mga sakyanan nga mamahimo pang gamiton, i-donate ngadto sa mga opisina sa dakbayan kon kini ideklara pinaagi sa usa ka resolusyon nga ang sakyanan usa ka donasyon.

Matod ni Jumao-as, adunay mga tag-iya sa mga na-impound nga sakyanan nga miduol na nila ug nagpatabang tungod niabot na ilang bayranan og P120,000. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph