SUBAY sa tinguha ni Cebu Governor Gwendolyn Garcia nga makapadayon ang tourism economy sa lalawigan sa Sugbo, personal niya nga gibisita ang nailhan nga manmade Bamboo Forest sa Barangay Luy-a, lungsod sa Medellin.
Ang unom na ka tuig nga bamboo forest gipanag-iya ni Jose Mari Miranda.
May tulo ngadto sa upat ka klase o variety sa kawayan ang gitanom ni Miranda sa lugar nga motabang sa pagpanalipod sa kasikbit nga banana plantation ug katubhan.
Ang kawayan usa sa labing importante nga elemento nga motabang sa pagbalanse sa oxygen ug carbon dioxide sa palibot ug makatabang pakigbatok global warming.
Matag lihok sa kawayan, gituohan nga mopagawas kini og sobra pa sa 35 porsiyento nga oxygen. Mas taas kini kon itandi sa ubang mga kahoy.
Gihulagway nga dili lang normal nga bamboo forest ang anaa sa lungsod tungod kay daw sama kini sa Kyotto, Japan. May mga dayandayan ug adurno nga sama og anaa ka sa maong nasod.
Mahimo nga mag-picnic, magsul-ob og “yukata” ang tradisyonal nga sinina sa mga Hapon nga maabangan usab sa lugar.
Usa sab kini sa mga duawunon sa mga couple nga mag-prenuptial shoot.
Ang entrance fee magkantidad lang og P20 samtang libre alang sa mga bata nga nag-edad 10 anyos paubos.
Gawas nga makaginhawa ka og presko nga hangin, may lamian usab nga mga pagkaon nga gibaligya sa sulod.
Pasidaan lang alang sa mga turista, gidilin ang paglabay og basura o ang paghugawhugaw sa dapit.
Gawas sa Medellin may laing manmade forests usab sa ubang bahin sa Probinsya sa Sugbo sama nalang sa Barangay Campo 7, lungsod sa Minglanilla ug sa Barangay Tuyom, dakbayan sa Carcar.
Inay mopalayo pa ug mogasto sa pagbiyahe sa laing nasod aron makasinati sa Japan vibes, giawhag ni Garcia ang mga Sugboanon ug mga turista nga bisitahon ang maong tourist destination. (ANV)